Aalisarneq
Qeqertarsuup Tunuani saarulliit tunisassiat marloriaat sinnerlugu amerlipput
Saattuanilli tunisassiorneq appariangaatsiarpoq, tamanna angallatit pisoqalisimanerannik pissuteqarpoq
Nunatta imartaata saarulleqarnerulernera Qeqertarsuarmi Royal Greenlandip tunisassiorfiani malugaat.
Tassami siornamut sanilliullugu saarullinnik tunisassiorneq marloriaat sinnerlugu annertusivoq. Siorna novemberimi saarulliit 71 tonsit suliareqqitassatut tunisassiarineqartut, ukioq maanna novemberip aallartinnerani 153 tonsit suliareqqitassatut tunisassiarineqareerput.
Royal Greenland nittartakkamini taama allappoq.
Saarulliit angisuut
- Ukioq manna saarullinnik tunisineq pitsaaneroqaaq. Saarulleqarnerulernera Qeqertarsuarmi aamma malunnarpoq. Saarulliit tulaanneqartartut angisujupput kusanarlutillu, Qeqertarsuarmi tunisassiorfimmi ingerlatsisoq Emil Mølgaard oqarpoq.
Naak tamanna nutaarsiassatsialaagaluartoq, saattuanik tunisassiorneq annikillivoq.
- Siorna novemberi tikillugu saattuat 300 tonsingajaat tunisassiaraavut. Ukiorli manna maannamut 135 tonsiinnaat tunisassiarereerpavut. Ukioq manna saattuanik tunisisukinnerunera angallataatillit namminersortut angallataasa pisoqalisimanerannik aamma aalisartut angallataatimik aserfallatsaaliorniarnerata unamminartoqarsimaneranik peqquteqarpoq. Angallatit marluk atorsinnaajunnaarnikuupput, tamannalu saattuanik tunisassiornitsinnut malunniutaavoq.
- Pisassiissutit tamakkerlugit aalisarneqarnissaat naatsorsuutiginngilarput, Emil Mølgaard Royal Greenlandimi tusagassiortunut oqarpoq.
Qeqertarsuarmi tunisassiorfik nipisat suaannik aamma qaleralinnik tunisassiorpoq. Nipisat suaannik tunisassiat novemberip aallartilarnerani 70 tonsiupput qaleraliillu 19 tonsit tunisassiarineqarlutik.