Royal Greenlandip Ruslandimi suliffeqarfimmi aktiat tunissavai
Royal Greenland Russit ingerlatseqatigiiffiannit, Agama Royal Greenlandimit aniniarpoq. Suliffeqarfissuup aktiaatini tunniutiinnarnagit tuniniarniarpai, pisortaq oqarpoq.
Royal Greenlandip Russinik Agama Royal Greenlandimi raajanik aalisakkanillu tunisassianik poortuinermik ingerlatsisumi suleqateqarnerminit aktiat tuniniarlugit suliniuteqarpoq.
Aviisi Sermitsiaq taama allappoq.
- Nunarsuarmi pissutsit taamaatsillugit Russit ingerlatseqatigiiffianni anisussaavugut, Royal Greenlandimi tuniniaanermut pisortaq Bruno Olesen oqaluttuarpoq.
Kisianni Ruslandimi poortuivimmik piginnittuunerup taamaatinnissaanik suliaq ajornakusoorluinnarpoq, taanna nassuerpoq.
Royal Greenland ukiut 25-t sinnerlugit raajanik aalisakkanillu tunisassianik tunisaqarlunilu ingerlatseqatigiiffiup ingerlanneqarneranut peqataasimavoq, tassani poortuivik Moskvap avataaniittoq ingerlanneqarlunilu pigineqarpoq.
Tamanna Russit aalisarnermik suliffeqarfissuat Agama Group peqatigalugu ingerlanneqarpoq, taanna Russinit marlunnit pigineqarpoq. Agama Royal Greenland suleqatigiilluni ingerlatseqatigiiffiuvoq, tassani Agama Group aalajangiisutut sunniuteqartuulluni.
Royal Greenland aktianik tunisiniarluni alloriarpoq, Ruslandimit tamakkiisumik aninissaq siunertarineqarmat.
Ruslandip sisamanngornermi 24. februar Ukrainemut saassussinerata kingorna, Namminersorlutik Oqartussanit pigineqartup Royal Greenlandip, Ruslandimi niuernermik niueqateqarnermillu suliatik arfininngornermi 26. februar unitsereeraallu tamanna pivoq.
Aviisimi Sermitsiami atuarnerusinnaavutit. Aviisi uani pissarsiariuk: