aatsitassarsiorneq
Rubininik piiaavissami sanaartorsinnaalerneq Naalakkersuisunit nuannaarutigineqarpoq
True North Gems Greenland-ip rubineqarfimmi safirinillu aappilarujuttunik Aappaluttumi sanaartornissani aallartissinnaaleraa sisamanngormat nalunaarutigineqarpoq, tamanna Naalakkersuisunit nuannaarutigineqarpoq
True North Gems Greenlandimi pisortap Bent Olsvigip sisamanngormat nalunaarutigaa suliffeqarfik rubineqarfimmi safirinillu aappilarujuttunik peqarfimmi Aappaluttumi sanaartornissani aallartissinnaaleraa.
Tamanna Naalakkersuisunit nuannaarutigineqarpoq.
- Qeqertarsuatsiaat eqqaanni rubinisiorfissamut aningaasalersuinissamik angusaqarneq pillugu True North Gems Greenland-imit ullumi nutaarsiassaq Naalakkersuisut qujaruppaat, peqatigisaanillu aatsitassanut periusissami ukioq manna siusinnerusukkut tamanut saqqummiunneqartumi anguniakkat ilaannik suli allamik angusaqarneq nuannaarutigalugu, Jens-Erik Kirkegaard tusagassiutinut naluaaruteqarpoq.
Aningaasaliisartunut takussutitsisoq
Piiaavissami sanaartornissat atortussallu akissaqartinneqalerput, kingusinnerusukkut piiaanissaq suliareqqiinissallu aallartissinnaalerlutik.
- Kalaallit Nunaanni aatsitassarsiorfimmik ingerlatsineq ajornanngilluinnartoq, nutaarsiassaq nunarsuarmut avatangiisumut aammalu aningaasaliisartunut sakkortuumik takussutissiivoq, Jens-Erik Kirkegaard oqarpoq.
Rubinisiorfik safirisiorfillu aatsitassarsiorfiit kaaviiaartitanit royalty-mik atugassaqartitsiviulluni aallartinneqartut siullersaraat.
Kalaallit Nunaanni aatsitassarsiorfimmik ingerlatsinermut royalty-mik atugassaqartitsinissaq tassarpiaavoq Inuussutissarsiornermut Aatsitassanullu Naalakkersuisup Jens-Erik Kirkegaard-ip suliassatut pingaartitarisaa.
- Naalakkersuisut tungaanniit nutaarsiassaq nuannersoq naammagisimaartorujussuuarput. Nutaarsiassami takutinneqarpoq royaltymut tunngatillugu allannguinerit kissaatigisavut aammalu tamatuma kingorna periusissaq ingerlassimasarput, niuerfimmi unammilleqatigiiffiusorujussuugaluartumiluunniit ajornanngitsut piviusorsiortullu, naalakkersuisoq oqarpoq nangillunilu:
- Aatsitassanut suliassaqarfimmiinnaanngitsoq, kisiannili aamma Suliffeqarnermut suliassaqarfimmut, Naalakkersuisutut akisussaasuusutut suliffissaqartitsiniarnermi kaamisaanissamut periarfissaqalernera nuannaarutigineqarpoq.