avaleraasartoorniarneq
Sapaatit akunnerini tallimani avaleraasartuut 21.000 tonsit pisarineqarput
Umiarsuit Tunumi avaleraaasartoorniartut ulloq unnuarlu avaleraasartuut 1.600 tonsit missaanniittut pisarisarpaat
Umiarsuit avaleraasartoorniaqataasut 17-iupput, ataasinngormallu juulip 21-anni Tunumi avaleraasartuunik katillugit 20.899 tonsinik pisaqareersimapput. Taamatut tusagassiorfinnut nalunaarutikkut paasissutissiivoq Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq Jóhanna Lava Køtlum.
Ilimanarluinnarpoq ullormut pisarisartakkat amerliartuinnartut. Tassami Aalisarsinnaanermut Akulersissutinik Nakkutilliisoqarfik paasissutissiivoq ulluni kingullerni avaleraasat ullormut 1.200 aamma 1.600 tonsit akornanniittut pisarineqartartut, juullip aallaqqaataanit juulip 15-iata tungaanut ullormut pisarineqartartut 400 aamma 1.000 tonsit akornanniissimallutik.
Tunumi misileraalluni avaleraasartoortuassanik 100.000 tonsinik aalisarneq aallartivippoq juunip 13-ianni, taamanikkut umiarsuaatileqatigiit ilaata umiarsuaa ataaseq Tunumi siulliulluni avaleraasartoorniarmat. Aatsaalli juunip naalernerani avaleraasartuut sumiissusersineqarput, soorlu titartakkami takuneqarsinnaasoq, tusagassiorfinnut nalunaarummi allassimavoq.