Sikuiuitsoq Avannarlermi uuliasiorluni qillerisoqassanngitsoq

Imartat sisamat immikkut ajortiasut uuliamik ujaasiorfigineqartussaajunnaassapput. Aatsitassarsiornermi avatangiisinut malittarisassat pillugit periusissiami 2019-mit 2023-mut atuuttussami tusarniaassutigineqartumi tamanna atuarneqarsinnaavoq.

Ilaatigut Sikuiuitsoq Avannarleq, uani Kalaallit Nunaata Kitaani 75° N-imik aamma Kalaallit Nunaata Kangiani 80° N-imik nassuiaaserneqartumi.

Sumiiffiit uuliasiorfigineqannginnissaanik peqqussutit ilisimatuussutsikkut siunnersortinit Pinngortitaleriffimmit (GN) aamma Dansk Center for Miljø og Energi (DCE) Aarhus Universitetimeerput.

- Suliarinnittussarsiornermut atatillugu DCE-p aamma GN-ip Kalaallit Nunaata avannaani imartat – tassa Kalaallit Nunaata kitaani 75° N-ip aamma Kalaallit Nunaata Kangiani 80° N-ip avannaani suliarinnittussarsiorfigineqannginnissaat peqqussutigaat, annerusumik minnerusumilluunniit sikuujuaannarnera pissutigalugu, ajutoornissamut aamma uuliakoornissamut navianartorsiornermik annerulersitsimmat, ilaatigullu aamma uuliakoornerit piiarneqarnissaannik ajornakusoortitsimmata, ilisimasallit taama naliliipput.

Nerisaqarfiit

Sumiiffiit allat ilaat uuliasiortut qillerutaannik inerteqquteqarfissat periusissiaq naapertorlugu tassaapput Pikialasorsuaq Qaanaap Umimmaat Nunaatalu akornanniittoq. Sumiiffik taanna sikoqanngitsoq imarmi miluumasut aamma timmissat imarmiut nerisarfissuaraat.

Alla inerteqquteqarfissat tassaavoq, Kangertittup paava.

Sumiiffiit sisamaat uuliasiorfigineqarnissamut inerteqquteqarfissaq tassaavoq, Attup Uummannaata Avataa.

DCE nalunaarusiami immikkut ittumi sumiiffimmi uuliakoornermik akiuinissamut periarfissat misissorsimavai. Akiuiniarnerup pinngortitami ataqatigiinnermik ajoqusiisoqarnerunissaa tassani inerniliunneqarpoq.

- Attup Uummannaata Avataani uuliakoornermik akiuinissamut periarfissat killeqartut nalilerneqarpoq, nalunaarusiami tamanna oqaatigineqarpoq.