Sikuki: Isumaqatigiissitsiniarnissamut piareersarsimanerit naatsorsuutinut nanertuipput
Sikuki Nuuk Harbour 2019-imi akileraarutit peereerlugit 7,6 millioner koruuninik sinneqartoorsimavoq. Nuummi umiarsualiviliornerup kinguaattooruteqarfiunera pillugu inatsisitigut sulissutigineqarnissaa utaqqineqarpoq.
Namminersorlutik Oqartussat ingerlatseqatigiiffiutaat Sikuki Nuuk Harbour, Nuummi umiarsualivinnik containereqarfimmillu nutaamik ingerlatsisoq sisamanngormat ataatsimeersuarpoq.
Tassunga atatillugu ingerlatseqatigiiffiup ukiumoortumik nalunaarusiaa saqqummiunneqarpoq, takuneqarsinnaavorlu akileraarutit suli peernagit 9,4 millioner koruuninik, akileraarutillu peereerlugit 7,6 millioner koruuninik sinneqartooruteqarsimasoq.
Akileraarutit peereerlugit angusarineqartut 1,7 millioner koruunit 2018-imut sanilliullugu pitsaanerupput, siulersuisunillu tamanna naammagisimaarneqarpoq.
Isumaqatigiissitsiniarnermut annertuunik aningaasartuuteqarsimaneq
Ingerlatseqatigiiffimmit peqatigitillugu oqaatigineqarpoq, Per Aarsleff Grønlandilu, containereqaarfimmik nutaamik sanaartorsimasumut, saqitsaassuteqarneq angusanut sunniuteqarsimasoq:
- 2019-imi angusat isumaqatigiissitsiniarnissamut piareersarnermi annertuunik aningaasartuuteqarsimanermit sunnernerlunneqarsimasut.
Sanaartornerup kingusinaarnera isumaqatigiinngissutaasimavoq. Containereqarfissaq november 2016-imi naammassillugu suliarineqartussaagaluartoq, august 2017-imi aatsaat tunniunneqarpoq.
Ukioq manna aalajangiisoqassanngitsoq
- Sikuki kinguaattoorluni tunniussinermut ullormut akiliuteqartoqartarnissaanik piumasaqaateqarsimvoq, sanasullu akerlianik piffissaliussap sivitsorneqarnissaanik immikkut akiliuteqartoqarnissaanik piumasaqarsimallutik. Tamanna Sikukimit itigartinneqarsimavoq, kingusinaartumik tunniussinermi akiliuteqarnissasmik isumaqatigiissummi aalajangersagaqarnera innersuussutigalugu. Isumaqatigiinnginneq isumaqatigiissitsiniarnikkut aalajangiiffigineqassasoq naatsorsuutigineqarpoq, ingerlatseqatigiiffik allappoq.
Sikukimi pisortaaneq John Rasmussen ilisimatitsivoq, suliap ingerlanneqarnerani, isumaqatigiissitsiniarnissamut piareersaanermi aningaasat qanoq annertutigissanersut tamanut tusarliuteqqusaanngitsut.
Pisortap naatsorsuutigaa, siusinnerpaamik 2021-mi suliaq aalajangiiffigineqarumaartoq.
Suliarineqartartut amerliartortut
Umiarsualivimmi kisitsisit pingaarnerit misissuataaraanni takuneqarsinnaavoq, Nuup umiarsualiviani 2019-imi suliarpassuaqartoqarsimasoq. Ilaatigut aalisakkat qaleruallillu usigiarneqarsimasut 2018-imi 35 tusinde tonsingajanniit 2019-imi 43 tusinde tonsinut amerleriarsimapput.
Umiarsuit takornariartaatit 2018-imi umiarsualivimmut tulassimasut 34-usinnarlutik 2019-imi 36-usimapput. Akerlianik umiarsuit containerinik assartuisartut ikinnerulersimapput. Taakku 2018-imi 161-iusimariarlutik 2019-imi 141-usimapput.