saarullinniarneq
Sisimiuni aalisartut aalisarumajunnaartut
Sisimiuni Aalisartut Piniartullu Peqatigiiffiata ullumi marlunngornermi ataatsimeereernerup kingorna, aalisartut aalisarunnaarlutik aalajangertut nalunaarutigaa. Pinartumillu umiarsuarmik saarullinnut tunitsiviliisoqanngippat, umiarsualivimmik assersuinissamik aarlerisaaripput
Sisimiuni aalisartut ullumikkut marlunngornermi saarullinnik aalisarnertik unitsippaat, tamanna Sisimiuni saarullinnik tunisinissamut periarfissarititaasunik naammaginninnginnerannik peqquteqarpoq.
- Ukiuni kingullerni Sisimiuni aalisarnikkut pissutsit akuersaarneqarsinnaanngitsut maannamut atuunnerat Sisimiuni aalisartut naammagiunnaaramikku ullumi ataatsimeereerlutik aalajangerput ullumikkut atuutilersumik aalisarumajunnaarlutik, Leif Fontaine peqatigiiffimmi ilaasortat sinnerlugit taama allappoq.
Aalisartut aqagumut pingasunngornermi nalunaaqutaq 13.00 akerliussutsimik takutitsinissamik pilersaarusiorput, tassanilu umiarsualivimmiit Qeqqata Kommuniata allaffianut ingerlaaqatigiissapput oqalugiartoqassallunilu.
Siumut Sisimiut: Saarullinnik tunisinermi unammilleqatigiinneq eqqunneqarli
Sisimiuni aalisartut ataatsimiinnerminni aamma aalajangiuppaat pinartumik saarullinnut umiarsuarmik tunitsiviliisoqanngippat ataasinngorpat umiarsualivimmik assersuissallutik.
- Pinasuartumik saarullinnut umiarsuarmik tunitsiviilissoqanngippat ataasinngorneq 29. juni 2015 nalunaaquta 8.00, Sisimiuni umiarsualivik atorneqarsinnaajunnaarlugu assersorneqalissaaq.
Sisimiuni Aalisannermut Piniarnermut Peqatigiiffik taama nalunaaruteqarpoq.
Pisortanik soraarsitseqqusisut
Sisimiuni aalisartut sakkortuumik piumasaraat inuiaqatigiit pigisaata Royal Greenland A/S-ip pisortaasa sallu atorlugu Sisimiuni aalisartunik nikassaanerakkatik piginnittunit kinguneqartinneqartariaqartoq.
- Sisimiuni aalisartut sakkortuumik piumasaraat Royal Greenland A/S pisortat eqqunngitsumik ingerlatsisut soraarsinneqartariaqartut, Sisimiuni Aalisartut Piniartullu Peqatigiiffiat tusagassiuutinut taama nalunaaruteqarput.
Atuaruk: Ullormut tulaassuisoqannginneraniit 40 tonsinik tulaassuinermut
Atuaruk: Umiarsualivimmik assersuinissamut aalisartut piareeqqasut