Suliariumannittussarsiuussineq: Kujataani timmisartoqarfiliornissaq qanillivoq
Qaqortumi pilersaarutaasutut timmisartoqarfiliornissamut atatillugu mittarfissat illutassallu sananeqarnerat qanoq akeqarnersut ullumi saqqummiunneqassapput.
Kalaallit Airports Domesticip Qaqortumi timmisartoqarfiliornissap qanoq akeqarnissaanut neqeroorutit qulingiluat ullumit tigussavai, pissanngatigineqarporlumi neqeroorutigineqarut missingersuutit iluanniissanersut.
Ingerlatseqatigiiffiit tallimat mittarfiliornermi, timmisartut uninngasarfiannik sananermi, sanaartorfissamik sanaartorfigissaanermi kiisalu tikittarfiliornermi uninngasarfiliornermilu qanoq akeqartitsiniarnerminnik neqerooruteqatussat tassaapput:
MT Højgaard A/S
Aarsleff Istak
JK Petersen Contractors
Munck Havne & Anlæg
Pennecon Heavy Civil Ltd
Ingerlatseqatigiiffiit sisamat terminalimik, kiffartuussivimmik timmisartunillu aqutsiveqarfimmik sanaartornissamut neqerooruteqartussat tassaapput:
ArtiCon
Permagreen Greenland A/S
Ístak hf
MT Højgaard A/S
Innuttaasut soorunami qanoq akeqassanersoq pissanngatigivaat, mittarfinnilli ingerlatseqatigiiffiup ullumi tallimanngornermi suliarinnikkumasut neqeroorutiminnik. tunniussinnginneranni ilisimatitsissutigaa ”neqeroorutigineqartut nalilersorluaqqaartinnagit aamma neqerooruteqartut isumaqatiginninniarfigitinnagit kiisalu piginnittunik oqaloqateqartinnani” neqeroorutigineqartunut tunngatillugit oqaaseqartoqarumanngitsoq.
Neqeroortitseqqissimaneq
Mittarfiliortussasiortoqareersimavoq, neqeroorutigineqartulli tamarmik missingiussat sinningaatsiarlugit akeqartitsiniarsimammata, mittarfinnik ingerlatseqatigiiffik piginnittut isumasioriarlugit neqeroortitseqqittoqassasoq aalajangersimalluni – taamaattoq neqeroortitsinermi tunngavigineqartut allanngortinnagit.
Ukiup affaata kingulliup ingerlanerani sanaartornermit atortut akittoriartuinnavissimapput, taamatut ingerlasoqarnerata malitsigisaanik sanaartortunut aningaasartuuteqarnerulertoqassasoq ilimanarluni.
Kalaallit Airports Domestic, Namminersorlutik Oqartussanit tamakkiisumik pigineqartoq ingerlatseqatigiiffimmut Nuummi Ilulissanilu timmisartoqarfiliortumut attuumassuteqanngitsoq, najukkami timmisartoqarfiliornissamut 674 millioner koruuninik aningaasaliiffigineqarsimavoq. Aningaasalli taakku naammassanersut qularnarpoq.
Periarfissat pingasut
Timmisartoqarfimmi pisortap Jens Lauridsenip siusinnerusukkut oqaatiginikuuaa, neqeroortitsineq nutaaq ingerlatseqatigiiffiup missingersuutaasa iluaniinnissaanik isumaqartoqassappat tamanna sianiinaarnerussasoq. Tamannalu tunngavigalugu suliassap ingerlaqqinnissaanut pingasunik periarfissaqarnerarpaa:
Politikerit ingerlatseqatigiiffimmut amerlanerusunik aningaasaliisoqarnissaanik aalajangernissaat
Suliassap akikinnerulersillugu annikillisinneqarnissaa
Imaluunniit periarfissat marluk siuliani pineqartut ataatsimoortinneqarnissaat.