suliffissaaleqineq
Suliffissaaleqisut sammillugit
Sapaatip akunnikkaartumik apeqqarissaarnermi Inatsisartunut ilaasortat suliffissaaleqineq aaqqiissutaasinnaasullu sammivaat
Pingasunngormat ullaap tungaani qulisimalluni sila nuannerpianngitsoq inuussutissarsiornermut, sulisartoqarnermut, niuernermut nunanullu allanut tunngasunut naalakkersuisup Vittus Qujaukitsup (S), nuna tamakkerlugu suliffissaaleqisut amerlassusaannut kisitsisit nuanninngitsut saqqummiuppai.
– Ullumikkut suliffissaaleqisut 3.953-iupput, taakkunanngalu 468-ita nunaqarfinneersuupput, taanna oqarpoq.
Suliffinnik qanoq isillusi pilersitsissavisi?
– Pingaartumik Qaasuitsup Kommuniani Tasiilamilu, suliffissaaleqiffiusorujussuarni, takorloorpisiuk suliffinnik qanoq ittunik pilersitsisinnaanerlusi?
Tamatumunnga naalakkersuisoq nassuiaavoq sumiiffinni taakkunani isertitat amerlanerpaartaat aalisarnermeerlutillu piniarnermeersuusut, kissaatigineqartorli takorniariaqarnikkut isertitat amerlanerulernissaat.
Nutaamik eqqarsarneq
– Pisariaqartippavulli nutaamik eqqarsarneq nutaanillu pilersitsinissaq, aamma eqqumiitsuliornerup nipilersornerullu iluanni. Nunaqarfinni takornariaqarneq siuarsarneqassaaq. Mersortarfiit sanaluttartullu allat kusanartulianik tuniniarneqarsinnaasunik sanasinnaapput. Najugaqarfeeqqanullu periarfissat misissuleruttorpakka, Vittus Qujauikitsoq paasissutissiivoq.
Politikerit oqaaseqaataat allat Sermitsiaq normu 19-imi atuakkit. Aviisi ataani linki atorlugu pisiarisinnaavat