Sulisitsisut: Neriniartarfiit caféllu taartisisariaqarput
Maleruaqqusat kingulliit atuutsilersinneqartut pillugit Naalakkersuisut Sulisitsisullu qanimut oqaloqatigiissuleqarput. Neriniartarfinni 20-inik taamaallaat neriartortoqarsinnaanera pinngitsaaliilluni matusisariaqarnerusoq, Sulisitsisut isumaqarput.
- Naleqquttumik taarsiisoqarnissaa sulissutigaarput. 20-inik taamaallaat neriniartarfinniittoqarsinnaappat, taava neriniartarfik matuniarneqarpoq. Neriniartarfiit 20-inik nerisitsineq aningaasarsiutigisinnaanngilaat, Sulisitsisuni pisortaq, Christian Keldsen Sermitsiaq.AG-imut oqarpoq.
Inuit katerissinnaasut 20-inik juulip 13-ani Naalakkersuisuniit killilerneqarpoq. Taassumallu saniatigut Qaqortumiit Sisimiuniillu aallartoqaqqusaajunnaarluni. Illoqarfinni taaneqartuni aallaqqusinnginneq ataasinngornermi juulip 19-ani unitsinneqarpoq.
Inuit katerissinnaanerisa killilersorneqarnera maanna juulip 30-ata tungaanut atuutsissaaq. Tamannalu neriniartarfinnut imerniartarfinnullu amigartooruteqarfiusussaavoq.
- Suliffeqarfiit aningaasanik kaaviiaartitsissagunik 20-it ikippallaaqaat. Inatsisitigut pinngitsaaliilluni matusiniartoqanngilaq, killilersuinermilu matusiniartoqarpoq. Neriniartarfiit pinngitsaalillugit matuneqarsimasuuppata arlaatigut toqqaannartumik ikiorserneqarsinnaassagarluaprut. Maannali tamanna pinngilaq, Sulisitsisuni pisortaq oqarpoq.
Corona inooqatigalugu ilikkarneqartariaqarpoq
Neriniartarfiit ulluni makkunani ilungersunartorsioraluartut, Naalakkersuisut Sulisitsisullu pitsaasumik oqaloqatigiittut, Sulisitsisut isumaqarpoq. Inuiaqatigiit akornanni corona inooqatiginera ilikkarneqartariaqartoq, Sulisitsisut isumaqarpoq.
- Arlaat tunillatsissimasoq paasineqaraangat ingerlaannaq matusassagutta peqqinnartuunngilaq. Corona inooqatigalugu ilikkartariaqarparput. Coronapas-eqarpoq aamma misissuikulasoqarsinnaavoq. Taamaaliornikkut inuiaqatigiit iluani aalaajaatsumik inuusoqarsinnaavoq. Corona maanna pissutsini piviusuni ilaalernikuuvoq, Christian Keldsen nassuiaavoq.
Nunani tamaalani tuniluuttoqarnerani inuit katerissinnaasut 20-iunissaanik innersuussuteqartarnerat pissutaalluni Nunatsinni aamma taama killilersuisoqalerpoq.
- Tassa nakorsaanerup soorlu oqaatigisaattut Nunani tamalaani misilittagarineqartut aallaavigalugit naliliinerit Nunatsinni killilersuineq tamaatut isikkoqarpoq. Pitsaanerpaamik tunillaasuisoqannginnissaanik inassuteqarnerminni innersuussutit taakkuutippaat, Naalakkersuisut siulittaasuat, Múte Bourup Egede Sermitsiaq.AG-imut oqarpoq.
Tunillatsissinnaaneq inooqatigisariaqarparput
Taartisisoqarnissaa coronalu inuiaqatigiit akornanni inooqatigineqarnera ilikkarneqartariaqarneranik Sulisitsisut oqariartuutigaat. Taassuma saniatigut ilaasortagisaminniit, tassa 330 missaaniittuniit, suliffeqarfiillu 7.000 missaaniittuniit apeqqutigineqarsinnaasut Naalakkersuisunut apeqqutigisarpaat.
- Sooq akiuussusersorneqarnikut kisiisa iluaqutissineqartarnerat apeqqusertarparput. Sooruna aamma 20-inik taamaallat katerissinnaasoqartoq? Soormi kapitinnikut akornanni katerissinnaasut 50-iugunik? Tamakkununnga tunngatillugu oqartussat aamma piumasaqarfiginiartarpagut, Christian Keldsen oqarpoq.