isornartorsiuineq
Sulisitsisut Peqatigiiffiat: Malittarisassat paasinarsitillugit
Naalakkersuisooqatigiit aallaqqaataaniilli malittarisassat allanngorartissimavaat inuussutissarsiortunut ilungersornartumik, atorfinnilli pilersitsinissaq imminnut ajornakusoornerulersiinnarpaat, sulisitsisut peqatigiiffiat isumaqarpoq
– Allaffissorpallaarunnaarnissaq, ingerlatsilluarnerulernissaq eqaallisaanissarlu oqaatigiuminartuupput. Siunertalli pitsaasut piviusunngortinneqassagaangata piginnaassutsit iliuuseqarusussutsillu tammartaraat.
Taamatut Sulisitsisut Peqatigiiffianni ilaasortat atuagassiaanni Henrik Leth allappoq.
Isornartorsiuinera aallaaveqarpoq naalakkersuisooqatiginnissamik isumqatigissummik, Siumup, Demokraatit Atassutillu siulittaasuia 2014-imi decembarip 4-aanni atsiugaannik.
Sulisitsisut Peqatigiiffianni siulersuisuni siulittaasoq isumaqarpoq isumaqatigiissutip oqaasertai partiillu angusimasaat imminnut ungasissorujussuusut.
– Tamanna kiinaannguusaarani neriorsuutit qularnanngitsumillu ajunngitsumik isumaqaraluarluni siunertat naleqatigiinnginnerujussuannut annilaarnartumik assersuutissaavoq, pollitikkikkullu isummersinnaanermik, isumassarsiorsinnaanermik iliuuseqarsinnaanermillu amigaateqarnermik takutitsilluni, Henrik Leth allappoq.
Inuussutissarsiornermik suliallip, ulluinnarni Polar Seafoodimi atorfillip, pisortat allattoqarfianni malittarisassanik paatsiveqartitsinnginnermutd assersuutissatut taavaa, naalakkersuisooqatigiit namminneq piumasarisimagaat sanaartugassanut suliassat ingerlanneqartarnerat sukkanerusumik pisassasoq.
Misiliisimanngillat
– Namminersorlutilli Oqartussani kommuninilu sulianik ingerlatsineq sukkanerulersimanngilaq. Allaammi takusinnaasarput malillugu tamanna misilinneqarsimanngilarluunniit, Henrik Leth allappoq, assersuutissatullu taallugu Naalakkersuisut pilersaarutigigaat inuit, sulisitsisutik pisariaqanngitsumik pappialarsorpallaannginniassammata, angerlarsimaffimminni akeqanngitsumik internetteqartinneqartut tamatumunnga akileraartalernissat.
Namminersorlutik Oqartussat aamma ilimasaarutigisimavaat sanaartugassatut suliniutinut anginerusunut IBA-mut VSB-mullu isumaqatigiissusioriaatsit allanngortinniarlugit, taamaasillluni pisumiit pisumut allanngorartassallutik.
– Taamaasilluni qularnanngitsumik ingerlatsineq allaffissornerujussuussaaq suliniummiillu suliniummut allanngortassalluni.
Sulisitsisut Peqatigiiffiata aamma ajuallannartippaa namminersorlutik oqartussat teknikkikkut siunnersuisartunut malittarisassat ARBR89-imik taaneqartartut allanngortilermatigit.
– Malittarisassat misiligarluarneqarsimasuupput, suliassarpassuarni eqqartuussivinni misiligartarneqarsimasut. Maannali namminersorlutik oqartussat namminneq aalajangersimasumik malittarisassiornialerput, immikkut piumasaqaatitarpassualimmik. Tamanna siunnersuisunit ilismaneqanngilaq, allaffissornermik annertusaassaaq ilanngullugulu sillimmasiinermut piumasaqaatinik allanngortitsissalluni.