Sulisitsisut: Ukiorpassuarni ataatsimiinnerit pingaarnersaat
Maannakkut Inatsisartut ataatsimiinnerat ukiorpassuarni ataatsimiittarnernit pingaarnerpaavoq, taama isumaqarpoq Sulisitsisut pisortaat
Maannakkut Inatsisartuni ataatsimiinneq nunatta siunissaanut pingaarluinnartuussaaq. Ataatsimiinnermi tassani naalakkersuinermik suliallit aatsitassarsiornikkut patajaatsumik tunngavissiissapput taamaattoqarneraniillu ataatsimiinneq manna ukiut 20-t sinnerlugit aatsaat taama pingaartigaaq, Sulisitsisut pisortaat Brian Buus Pedersen KNR-imut oqarpoq.
- Inatsisit toqqammaviusussat qulakkeertariaqarpavut. Allatut periarfissaqanngilagut, taamaammat sukumiisumik tamanna sulissutigineqartariaqarpoq, KNR-imut oqarpoq.
Erseqqissarpaa ataatsimiinnermi aalajangiinerit pingaarluinnartuussasut.
- Suliniutini angisuuni illuliortiternernik sanaartornernillu suliassat pillugit inatsisissatut siunnersuut aamma aatsitassanut ikummatissanullu inatsit matumani eqqarsaatigaakka. Aalajangissat pingaarutillit taakku suliarilluagaasariaqarput. Inuiaqatigiinnut iluaqutaassaaq, suliffeqarfissuarnullumi aamma, Brian Buus Pedersen oqarpoq.