Umiarsuarnik takornariartitsisartut allatut tunisassiaqartalernissamik sulissuteqarput

Takornariartitsisartut coronap ajornartorsiortitsineranit immikkut annertuumik eqqugaapput, tamanna aamma umiarsuarnik takornariartitsisartunut immikkut eqquisismavoq.

Takornariartitsisartut workshopimi ingerlateqammikkaminni, umiarsuarnik takornariartitsisarnerup qanoq aallarteqqinneqarnissaa oqaluuserisimavaat:

- Tunisassiat qanoq tunniunneqarsinnaanerannut peqatigitillugu, ikaarsaariarnermi takornariat najukkanilu innuttaasut illersorniarlugit ulorianaataarsinnaasunik annikillisaanissaq oqaluuserineqangaatsiarpoq, AECO-mi - Association of Arctic Expedition Cruise Operators - pisortamut ikiorti Anders U. la Cour Vahl oqarpoq.

- Ilaatigut tunisassiat inunnut allanut attaveqarfiusariaqanngitsut eqqarsaatigisimavavut, tassa immitsinnut toqqaannartumik attaveqanngikkaluarluta kiffartuussisinnaanermut tunngasut, tamannalumi uagutsinnut nutaajusututu oqaaqitineqartariaqarpoq, Anders U. la Cour Vahl oqarpoq.

Taamaatitsiinnartoqartalersoq

Workshoppi Visit Greenlandip AECO-llu peqatigiillutik aaqqissuussimavaat, intenetsilu aqqutigalugu ingerlanneqarsimalluni. AECO-p umiarsuarnik mikinerusunik, 100-t 300-llu akornanni ilaasoqarsinnaasunik sullissisuuvoq.

Anders U. la Cour Vahlip Sermitsiaq.AG-mut oqaluttuaraa, takornariartitsisartut 2020-mi takornariartitsisarnissamut tunngatillugu maannakkorpiaq utaqqimaartut:

- Umiarsualivinni sullissisuit nalunaarutigineqarsimavoq, takornariartitsisarnerup aallartinnreani taamaatitsiinnartut arlaqartut, aamma piffissami kingusinnerusumi takornariarniat taamaatitsiinnartalersimasut, allalli qanoq pisoqarnissaanik utaqqimaarput

- Maannakkorpiaq pingaaruteqartoq tassaavoq, ammaaqqinniarnerup qanoq ingerlanneqarnissaanik qaamma qanoq sukkatigisumik ammaaqqittoqarnissaanik ilisimatinneqarnissarput, .

Peqqinnissatigut illersorneqarsinnaassasoq

Taassuma erseqqissaatigaa, ammaaqqinneq soorunami peqqinnissatigut illersorneqarsinnaassasoq, aamma umiarsuit takornariartitsisartut Kalaallit Nunaata sineriaani ilaasunik angallasseqqilertinnagit tamatuma periarfissaanissaa isumagineqaqqaassasoq.

- Takornariarniartummi namminneq nunaminni angalanissamut killilersuisoqarnera pissutigalu, tikissinnaanersut apeqqutaavoq, Anders U. la Cour Vahl oqarpoq.

Umiarsuarnik takornariartitsisarnerup aallartisaqqinneqarnissaata saniatigut workshoppimi aamma sammineqarpoq, Kalaallit Nunaanni umiarsuarnik takornariartitsisarnerup inerisarneqarnissaa:

- Visit Greenlandimit kissaatiginqarpoq umiarsuarnik takornariartitsisarnerup akisussaassueqartumik ineriartortinneqarnissaa, taamaammat AECO suleqatigalugu workshoppertitsinissaq aaqqissuussimavarput, AECO umiarsuarnik mikinerusunik akunnattumillu angissusilinnik takornariartitsisartunut sullissisuuvoq, taakkulu Issiittumi umiarsuarnik takornariartitsinermi ajoqusiisannginnissamik ilaasortaminnut piumasaqaaterpassuaqarput. Soqutigisaqaqatigiinnik tamanik oqaloqateqartarnitta AECO-millu suleqateqarnittar ingerlateqqinneqarnissaannut qilanaarpugut, Visit Greenlandimi pisortaq Julia Pars oqarpoq.