Umiarsuit takornariartaatit aningaasarsiutaalluartut
Umiarsuit takornariartaatit 2023-mi qaammatini qulini siullerni illoqarfiit pingaarnersaata kommuniani suliffeqarfinni millioninik pingasunik kisitsisitalinnik kaaviiaartitsisimapput. Tamanna nalunaarusiami Sermersooq Businessimit suliarineqartumi atuarneqarsinnaavoq.
Kalaallit Nunaat umiarsuarnik takornariartaatinik takornariartitsinermit isertitaqarluarpoq.
Kommuneqarfik Sermersuumi suliffeqarfiit 23-t 2023-mi januaarimiit novembari tikillugu umiarsuarnik takornariartaatinit 233,3 millionit koruuninik kaaviiaartitaqarsimapput. Tamatuma saniatigut pisiniarfiit neriniartarfiillu umiarsuarnik takornariartaatinik takornariartitsisunit 5,6 millionit koruuninik kaaviiaartitaqarsimapput, tassalu niuertarfik ataaseq agguaqatigiissillugu 1 millionit koruuningajannik kaaviiaartitaqartarsimavoq.
- Nuannaarutigeqaarput umiarsuarnik takornariartaatinik takornariartitsisarnermi aningaasatigut iluanaarutit pillugit kiisami paasissutissanik tigussaasunik peqaleratta. Tamassuma siunissami takornariaqarnermik pilersaarusiornissamut tunngavissaqarluarnerulersippaatigut, Mads-Daniel Skifte, Sermersooq Businessimi pisortaq oqarpoq.
Suliffippassuit
Nalunaarusiami aamma allassimavoq umiarsuarnik takornariartaatinik angallassinermut suliffissarpassuit attuumassuteqartut, tassanilu allassimavoq ulloq naallugu suliffiit 29-t, ullup affaani suliffiit 27-t ukiullu ingerlanerani suliffiit 155-it pilersinneqartut.
Nalunaarusiaq Sustine Consultip suliarisimasaa kommunimi suliffeqarfinnit 23-nit paasissutissanik tunngaveqarpoq. Suliffeqarfiit umiarsuaatileqatigiiffinnut, umiarsuarnut umiarsuarnillu takornariartaatinik assartuisartunut nunanit allaneersunit qanoq akiligassitsitigisimanerminnik kisitsisinik nassiussisimapput.
Nalunaarusiaq tunngavigalugu Sermersooq Business ilisimatitsivoq umiarsuarnik takornariartaatinik takornariartitsisarneq nunap aningaasaqarneranut pingaaruteqartoq, suliffeqarfiit misissuinermi peqataasut kaaviiaartitaasa 32 procentiisa missaanniittut umiarsuarnik takornariartaatinik takornariartitsisarnikkut kaaviiaartinneqarmata.
Millionilikkaanik aningaasaliisoqartoq
- Nioqqutissat takornarianit pisiarineqarnerpaat akii 40 koruuniniit 6000 koruuninut nikerarput, agguaqatigiissillugu 1078 koruunit, illoqarfiit pingaarnersaata kommunia nalunaarusiaq tunngavigalugu ilisimatitsivoq.
Sustine Consult aamma aperisimavoq, umiarsuarnut takornariartaatinut tunngatillugu suliffeqarfiit qanoq annertutigisumik aningaasaliisimanersut, siunissamilu qanoq annertutigisumik aningaasaliiniarlutik pilersaaruteqarnersut. 2023-mi 4,85 millionit koruuniupput, ukioq mannalu 5,8 millionit koruuninik aningaasaliisoqaqqinnissaa suliffeqarfiit pilersaarutigaat, 2025-milu takornariartitsinerup aallartinnginnerani 6,1 millionit koruuninik aningaasaliisoqaqqissalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...