Qaleralinniarneq
Upernavik Seafood: Royal Greenlandip iluanaarutai
Royal Greenlandip Upernavik Seafood qanoq pissarsiffigisarneraa Jens Immanuelsenip paaserusuppaa
Siumut tunuliaqutaralugu Inatsisartunut ilaasortaq Jens Immanuelsen isumaqarpoq Upernavik Seafood ineriartortinneqanngitsoq, ingerlatsivimmilu suliffinnik amerlanerusunik pilersitsisoqanngitsoq.
– Aali ingerlatsivik ukiuni arlalinngulersuni aalisakkanik naleqarluartunik tamakkuninnga kisermaassipajaarluni tigooraasartoq, Jens Immanuelsen paragraf 37 naapertortlugu apeqqumminut atatillugu allappoq.
Ingerlatsiviup namminersorlutik oqartussanit pigineqartup Upernavik Seafood A/S-ip piginneqataassutaasa 50 %-ii pigai.
Taamaattumik Jens Immanuelsen aperivoq Upernavik Seafoodip sinneqartoorutaanit qanoq annertutigisunik Roayl Greenland pissarsisarnersoq.
– Ukiuni arlalinngortuni Upernavik Seafood A/S qaleralinnik qerititeriinnarluni avammut niueruteqarpoq. Inuiaqatigiit 50 %-imik Royal Greenland A/S aqqutigalugu Upernavik Seafood A/S-imut piginneqataapput. Qanoq anigaasatigut Upernavik Seafood A/S pissarsissutigineqartarnersoq assut pisariaqarpoq paasissallugu, Jens Immanuelsen tunngavilersuummini allappoq.
Qanittukkut pisortap Flemming Andersenip Tamanut Avannaani-mut oqaatigaa aasaq manna Upernavimmi tunitsiviit arfineq-pingasut ammasut 400-nik pilersuisullut, katillugillu 174-inik sulisullit.