Upernavimmi nannuttassat ikilineqartut
Aqutsiveqarfimmut Upernavimmut nannunik pisassiissutit appartinneqarput, akerlianilli Uummannamiit Kangaatsiamut aqutsiveqarfimmut amerlineqarlutik
2013-imi nannuttassat agguataarnerat Aalisarnermut, Piniarnermut Nunalerinermullu naalakkersuisumit Ane Hansenimit akuersissutigineqarpoq.
Nannuttassallu tamarmiusut140-nik amerlassuseqartut pisassiissutinut aqutsiveqarfiit akornanni naleqqussarneqarput.
Tamatuma kinguneranik aqutsiveqarfimmi Upernavimmi pisassiissutit nannunik arfinilinnik ikileriarput, taakkualu Uummannamiit Kangaatsiamut aqutsiveqarfimmut pisassiissutigineqarlutik, taamalu tassani nannuttassat 2013-imi marloriaatinngorlutik.
Upernavimmut pisassiissutigineqartut ukioq manna 43-nik amerlassuseqartunut sanilliullugit 2013-imi 37-nik, Uummannamiillu Kangaatsiamut ukioq manna arfinilinnik amerlassuseqartunut sanilliullugit 2013-imi 12-nik amerlassuseqarput.
Baffin Bugtimi nannuttassat katillugit 67-inik, Kane Bassinimilu, tassa Qaanaami, Siorapalummi, Moriusami Qeqertanilu, arfinilinnik amerlassuseqarput. Davis Strædemi, tassa Sisimiuni, Nuummi Maniitsumik nannuttassat pingasunik, Tunumi 60-inik Kujataanilu avannamut Paamiut tikillugit sisamanik amerlassuseqarput.