Uumasunik nakkutilliineq
Kangerlussuup nunataata aqunneqarnera soqutigineqarluartoq
Qeqqata Kommuniani sapaatip akunnerata siuliani Kangerlussuup nunataa siammasissumik oqaluuserineqarnissaanik aaqqissuussivoq. Ataatsimiinnerit nunap tamakkerlugu aqunneqarneranik soqutigisalinnik, sumiffimmik aqutsinermik aamma sumiffiup pissusaanik soqutiginnittunit malinnaaffigineqarpoq, tamarmik sumiiffiup ineriartorteqqinnissaanik soqutigisaqartut, Qeqqata Inuussutissarsiornermik siunnersuisoqatigiivianit tusagassiivinut allapput.
Marlunngornermi unnukkut Kangerlussuarmi innuttaasut 25-t aamma Qeqqata Kommunianit, Kalaallit Nunaanni takornariaqarnermik aamma inuussutissarsiornermik siunnersuisoqatigiit kiisalu namminersorlutik oqartussanik pisortaqarfiit sisamat aallartitaat, Kangerlussuup eqqaani periarfissat unamminartullu pillugit oqallipput.
Nalinginnaanngilluinnarpoq kommunini namminersortullu oqartussanit aqutsinermik suliallit ataatsimoortillugit ataatsimeeqatigisarneri, taamaattumik ullut ataatsimiiffiusut ornigarneqarluarput Kangerlussuup eqqaani pissutsinut aaqqiinissaq pilertortumik ingerlanneqaqqullugu, inussutissarsiornermik ataatsimiititaq ilisimatitsivoq.
Ataatsimiinnermi sumiiffimmi aqutsinermi pilersaarut saqqummiunneqarpoq, tamatuma kingorna nerrivinnut pingasunut agguataarluni oqallittoqarpoq, ilaatigut piniariartarfiit oqaallisigineqarlutik, pisuinnarnik takornariartitsinerit, biilit aqqutaat, tammajuitsussarsiorluni takornariartitsinerit, aammalu illuaqqanut inissiiviit siunissamilu illuaraqarfiusinnaasut soorlu nunaqarfip ungataani qaqqani akunnittarfiliortoqarsinnaaneri.
Peqataasut oqalliseqataalluarput siunissamullu pilersaarutaasunut ilassutissanik atorfissaqarluartunik tunniussaqarlutik. Taamaatumik kommunimi aamma namminersorlutik oqartussani suliffillit oqaaseqaaterpassuarnik allattuipput pitsanngorsaatissanik ineriartoqqinnissamullu piukkunnaatilinnik saqqummiussuisoqarmat siunissami pilersaarummi atorneqarluarsinnaasunik, Inuussutissarsiornermik ataatsimiititaliaq tusagassiivinnut allappoq.