Visit Greenland umiarsuartigut takornariartitsisarneq pillugu: Nakkutigineqanngilaq
Nunat avannarliit killiit takornariaqarneq pillugu saqqummersitsinersuanni takornarialerisartut Islandimeersut, Savalimmiuneersut Kalaallillu Nunaanneersut misilittakkaminnik unammilligassarisartakkaminnillu avitseqatigiipput. Immikkut eqqumaffigineqartut ilagaat nunami maani piffissami kingullermi oqaluuserineqartartoq, tassalu umiarsuartigut takornariartitsisarneq.
Takornarialerisartut nunami maani oqaluuserinerusimasaasa ilagaat umiarsuartigut takornariartitsisarneq. Coronap atuunnerani taakkua amigaatigineqarsimapput. Maannali amerlasoorpassuullutik tikittalerput, inuit ilaat taamatut oqassannguatsiarput.
Kommunit, nunaqarfinni sinniisuutitat Visit Greenlandillu inuppassuit ataatsikkut tikittartut eqqarsarnartoqartilersimavaat, tassa umiarsuit umiarsuarujussuillu nunamut tikikkaangata inuppassuanngortarmata. Taamaammat takornariarpassuit tikittartut qanoq naleqqussarlugillu ataqatigiissaarneqarsinnaanerat isummerfigineqartariaqarpoq, Visit Greenlandimi pisortaaneq erseqqissaavoq.
- Nakkutigineqanngilaq. Eqqortumik ataqatigiissaarinissaq qulakkeerniarlugu maannakkorpiaq sinaakkusiortoqarsimanngilaq. Tamanna isumaginiarlugu inatsisitigut sinaakkutaateqanngilagut, umiarsualiviillu taakkuupput umiarsuit sorliit sumut qaqugulu tikisinneqassanersut aalajangiisartut, Anne Nivíka Grødem Sermitsiaq.AG-mut oqarpoq.
Killiliisoqarnissaa oqaluuserineqartoq
Umiarsuartigut takornariartitsisarnerup aallatinnginnerani Visit Greenlandimit naatsorsuutigineqarsimavoq, ukioq manna umiarsuit 388-it tikissasut. Aasalli ingerlanerani umiarsuit arlallit ullormi ataatsikkut tikittarnerat unammillernartinneqarsimavoq, Aavannaatalu Kommuniani borgmesterip Palle Jerimiassenip aamma Kommuni Kujallermi borgmesterip Stine Egedep tamanna mianersoqqutigisimavaat.
Taakku killiliisoqarnissaata pisariaqarnera oqaatigisimavaat, aamma Stine Egede tikittussat assigiinngitsut pillugit paasissutissiisoqartannginnera pillugu naammagittaalliorsimavoq. Tamanna Visit Greenlandimi pisortaanerup taperserpaa.
- Umiarsualivinni sulisut Visit Greenlandimut nalunaarutigisarpaat, umiarsuit sorliit tikissimanersut, takornariaqarnermillu inuussutissarsiuteqartut atuutiinnarnissaannu kiffartuussilluta nittartakkatigut tikittussat allattorsimaffii tamanut saqqummiuttarpavut.
Allattuisoqartarpoq najukkami takornarialerisut ilisimaniassammassuk umiarsuit sorliit qaqugu tikissanersut, qanoq ilaasoqartiginersut il.il., taamaalillutik tikittussanut piareersarsinnaaniassammata. Tikittussanik allannguisoqarsimanera taamaatitsiinnartoqarsimaneraluunniit pillugit paasissutissinneqanngikkutta, najukkami tikittut tupaallaatigineqartussaapput, tamannalu takornarianut inuussutissarsiuteqartunulluunniit pitsaasuunngilaq, pisortaaneq oqarpoq.
Takornariat inissallu imminnut naapertuutissasut
Tunngaviatigut umiarsualivimmi inissaqartitsineq umiarsuit tikinnissaannut tikinnginnissaannulluunniit aalajangiisuusarpoq, tikittussanilli ataqatigiissaarisoqarneq ajorpoq, tamannalu ajornartorsiutaavoq, pisortaaneq oqarpoq. Takornarialerisut nunaqarfinni illoqarfinnilu assigiinngitsuni tikeraanik 1000-inik ullormut isumaginninnissamut nukissaqannngillat.
- Umiarsuit takornariallu amerlassusaasa tikiffigineqartunut naapertuunnissaat qulakkeerniarlugu ataqatigiissaarisoqarneq ajorpoq.
Savlimmiuni umiarsuartigut takornariat killilerneqarnissaat oqaluuserineqarpoq, Visit Greenlandimilu najukkani pissutsit isigalugit najukkani pisinnaasat tunngavigalugit killiliinissaq oqaluuserineqarluni. Tamannali pissappat politikkerit inatsisiliortariaqarput.
Takornarianut piumasaqaateqartoqassasoq
Anne Nivíka Grødemip erseqqissaassutigaa, umiarsuit takornariartitsisartut tikikkaangata najukkami innuttaasunut ajortumi sunniuteqartannginnissaat matumani pineqartoq.
- Sumiiffinni ataasiakkaani pissutsinut naleqqussaasarnissaq pingaaruteqaqaaq, Ilimanami, Oqaatsuni Ilulissanilu pissutsit assigiinngitsupilussuupput. Najukkani killissat suunersut paasisariaqarpavut, najukkanilu sammisassat attaveqaasersuutillu eqqarsaatigalugit suliaqartariaqarluta.
Aamma allatigut iluarsiissuteqarnissamut periarfissarpassuaqarpoq, Anne Nivíka Grødem oqarpoq.
- Tikeraatsinnut piumasaqaateqarsinnaasariaqarpugut. Svalbardimi sumiiffippassuarnilu allani piumasaqaateqartoqartarpoq. Piumasaqaateqarneq ajoratta maannakkorpiaq umiarsuartigut takornariarfigiuminartuuvugut. Killilersuinertut ittuunngilaq. Assersuutigalugu piumasaqaatigisinnaavagut najukkami neqeroorutinik, najukkami takornariartitsisartunik il. il. atuisinnaanissaat. Piumasaqaateqarsinnaasariaqarpugut.