Water Taxi angalanissamut ikiorsiissutit iluaqutaanissaannik neriuuteqartoq
Naalakkersuisut kingullertigut ikiorsiissutaat, Nuuk Water Taxip suliffeqartitsiinnarnissaanut ingerlatseqatigiiffiullu ukiamut aniguilluarnissaanut ikiuutaasinnaapput.
Nuuk Water Taxi marlunngormat unnulluinnartoq nalunaaruteqarmat Nuup Kapisillillu akornanni akikilliliiniarluni, ingerlatseqatigiiffik inniminniiniartorpassuarnik saaffigineqareersimavoq.
Naalakkersuisut tapiissuteqarnerisigut, Nuuk Water Taxip nunaqarfimmut uterlugulu bilitsit 35 procentimik akikillisimavai, akikilliliinerit septemberip 30-ata tungaanut atuutissapput.
- Ikiorsiissutit qujaruteqaavut, neriuutigaarpullu akikilliliinissamik aaqqissuussaq iluaqutaajumaartoq qaammatinilu tulliuttuni amerlanerit angalarusulernerannik nassataqarumaartoq, NuukWater Taximi pisortaq Anders Lykke Laursen oqarpoq.
Suliffeqartitsiinnarnissamut iluaqutaassasoq
Nuuk Water Taxi takornariartitsinermik ingerlataqartut mikinerit ilagisaat Naalakkersuisunut ataasinngormat ikiorsiissutissanik nutaanik saqqummiussimmata, Naalakkersuisunut isumaqatigiissuteqarsimavoqg.
Ikiorsiissutillu Nuuk Water Taximut tigulluarneqarput:
- Ikiorsiissutit suliffeqartitsiinnarnissamut iluaqutaassapput. Tamanna ukioq manna pingaaruteqarnerpaavoq, inuimmi nalinginnaasut inuussutissaminnik pisiniartartut sulisoraavut. Aningaasarsiaqartussaapput, tamannalu silaannarmit isumagineqarsinnaanngilaq, Anders Lykke Laursen oqarpoq.
Pisortaq naapertorlugu, Nuuk Water Taxi coronap ajornartorsiortitsinera pissutigalugu naatsorsuutigisamit ikinnerusunik sulisoqarpoq, aaqqissuussarli nutaaq ajunngitsumik aallariartitsissaaqI:
Arlallit inniminniisimasut
- Bilitsinut toqqaannartumik tapiissuteqarnissamik suliniut sullitatsinnut annertuumik ikiuutaassaaq. Sapaatip akunnerata naanissaanut inniminniisorpassuaqareerpoq, aggustimilu angalaarfissat marluk ulikkaareerlutik, Anders Lykke Laursen oqarpoq.
Ingerlatseqatigiiffiit anginerit, soorlu Air Greenland aamma Disko Line ikiorsiissutinit tapiiffigineqarnissaq pillugu aamma isumaqatigiissuteqarsimapput.
Ikiorsiissutit Kalaallit Nunaanni angallammut ilaasunut toqqaannartumik akikillisaataasussaapput, aamma Nuuk Water Taxi Nuup nunaqarfiullu Kapisillit akornanni aalajangersimasumik ingerlaartartuugami tapiiffigineqarnissamut pisinnaatitaavoq.