Elbiilit naalakkersuisunit misilerarneqassapput
Naalakkersuisuni ilaasortat Kuupik Kleist Jens B. Frederiksenilu biilit innaallagiatortut matuersaataanik immikkut tamarmik Nukissiorfinniit tunineqassapput. Qaammat naammatsillugu misileraassapput.
Pingasunngorpat juulip 14-ianni nal. 15.00 Nukissiorfiit pisortaanerata Svend Hardenbergip biilinut innaallagiatortunut marlunnut matuersaatit Naalakkersuisunut ilaasortanut tunniutissavai.
Aaqqissuussineq Nuummi Katerittarfik Amisuni pissaaq, tassani illoqarfimmiut aamma biilinik innaallagiatortunik Nukissiorfinnit pisiarineqarsimasunik takusaasinnaassallutik.
Naalakkersuisunut ilaasortat misileraareerpata Nuummi suliffeqarfiit arlallit biilinik attartorsinnaassapput, teknologii nutaaq misilittagaqarfigilerniassammassuk.
Taama nittarsaassinerup saniatigut biilit innaallagiatortut pisinnaasaannik misissuineq nunant avannarliit allat peqatigalugit ingerlanneqassaaq.
Suliniummi El-mobilitymi biilit innaallagiatortut assigiinngitsut atlantikup avannarpasissuani pissutsini silaannarnilu assigiinngitsuni atorneqarnerini paasissutissanik sanilliussinissaq siunertaavoq. Nukissiorfiit saniatigut Icelandic New Energy aamma Orkusetur Islandimeersut kiisalu SEV Savalimmiuneersoq suliniummi peqataapput.
- Nukissiorfiit biilinik innaallagiatortunik maani nunatsinni misileraanissamut misilittagaqalernissamullu, kiisalu nunanit suleqatigisatsinnit Islandimit Savalimmiuniillu inernernut sanilliussinissamut biilinik marlunnik pisivoq, ineriartortitsinermut siunnersorti Jens Henrik Nielsen Nukissiorfiit suliniummut peqataanerannut akisussaasuusoq oqarpoq.