90-iliisoq Qaqortumi nalliussineqarpoq
Nunatsinni tissaluttutuaq Qaqortumiittoq ukiunik 90-inngortorsiormat innuttaasunit tallimanngormat nalliuttorsiutigineqarpoq.
Seqinnarik, aasarpalaaq kiinnallu qungujulasut.
Nunatsinni tissaluttutuaq tallimanngornermi 29. juli ukiunik 90-nngortorsiutigineqarpoq.
Kommune Kujalliup tissaluttup sananeqarneranit ukiut 90-nngornerat nalliuttorsiutigalugu aaqqissugaani angutit erinarsoqatigiit Saqqaarsik tussiarput, kiisalu Bibi Kielsen aamma Aka Høegh oqalugiarlutik.
Aka Høegh, Pavia Høeghip, tissaluttuliamik titartaasup ernutaraa. Pavia Høegh qatanngutinilu John Høegh tissaluttuliamik sanasuusimapput.
- Qaqortumi tissaluttoq 1932-imi eqqaassutissatut pilersinneqarpoq, taanna ujaqqanik qammagaavoq Qaqortullu illoqarfiup qeqqani inissisimalluni. Kuummut ungasinngilaq, kuullu ernganik imeqarluni imermik tissaluttumik kusanartuliatut kusertoqarluni, Kommune Kujalleq nittartakkamini allappoq.