Assit: Apummik ilusilersukkat sialussuaq anorersuarlu akiorpaat
Nuummi apummik ilusilersuilluni unamminermi sila allanngoraqaaq
Tallimanngormat Nuummi Nuuk Snow Festimi peqataasunut sialuk anorersuarlu misilinneqaataavoq, arfininngornerup ingerlanerani issileqqinnissaata tungaanut.
Festivalertulli silarluk naammagalugu atorpaat, sapaammilu ullup-qeqqanut apummik ilusilersukkat 15-it Nuup Saavani naammassisimalerput.
Iligiit ataasiinnaat ilusilersugartik naammassinngikkaat, Nuuk Snow Festimi suliniummik aqutsisoq Alberte Parnuuna, Sermitsiaq.AG-mut oqarpoq.
- Pissutsit atukkavut eqqarsaatigalugit ingerlalluarpoq, tassami sialuup aqqutai aqqutaapput. Kommunip sulisui imermik piialluaqaat.
- Sila sungiusimagatsigu pissutsit atukkavut naammagalugit atorpavut, suliniummik aqutsisoq oqarpoq.
Apummit festivali ingammik ilaqutariinnit meerartalinnit ornigarneqarluarpoq, ilaatigut erlinnartuutinik ujaasinermik aamma Sermersuup Nipilersornermik Ilinniarfiata tusarnaartitsineranik nuannaarutiginnittoqarluni.
Sila pissutigalugu tusarnaartitsinerit najukkap katersugaasivianut nuunneqarsimasut, tamannalu ajornartorsiuteqarani pisimasoq, Alberte Parnuuna oqaluttuarpoq.
Sapaammi nalunaaqutaq 15.00 ajugaasut kikkuuneri saqqummiunneqassapput, aamma isiginnaartut nersornaasiuttagaat tunniunneqassaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...