Assit: Eqqumiitsuliortup suliani nipitalerai
Pinngortitaleriffimmi illu nutaaq pingasunngormat atuutsinneqalermat,. eqqumiitsuliortup Inuk Silis Høeghip suliai saqqummersinneqarput
Pinngortitaleriffimmi ilinniartitaanermut illu atugassiaq taaguuserneqarsimavoq imatut, Pikilialaarfik – pisunik pikialaarfik - illup iluani iikkat eqqumiitsuliortup Inuk Silis Hæeghip eqqumiitsuliaanik pinnersaasersorneqasimapput, eqqumiitsuliat pinngortitami nipinik ukkataqarluni digitalimik atortoqarluni assinngortinneqarsimasut.
QR-mik ilisarnaasikkat
Eqqumiitsuliat tamarmik QR-mik ilisarnaasigaapput, taakkua mobiilimik scanneraanni nipit tusarnaarneqarsinnaanngussapput.
Eqqumiitsulianut taaguusiunneqarsimapput:
Qilalukkat qernertat immap naqqani, Nuussuaq, Qimusseriarsuaq
Qiporaq angutiviaq, Davidsstrædet
Illoqarfiup eqqaani qimmit, Ilulissat
Erngup issuatsiaat iluanni kuserusaarpalaarnera, Kangerluarsunnguaq
Kiinaaleeqqat innat akornanni, Kangiusaq
Sikuissuup ataani nipi, Niaqornat eqqaanni immiussaq
- Nipit assut tiguartiffigisuaannarnikuuvakka ingammik pinngortitamiitillunga, suliassarlu pinngortutut ippoq aavartillunga ukiut arlallit matuma siornatigut kiinaaleeraq mobilinnit immiukkakku, Inuk Silis Høegh nassuiaavoq.
Nipit immiunneqarsimasut uani tusarnaarsinnaavatit: nipit.natur.gl
Imarmiut pikialaffiat
Emma Kristensen illup atserneqarnera pillugu ima oqaseqarpoq:
- Manna illu ilisimasanik pisunillu pikialaarfiusussaammat taamatut atsissallugu piukkussimavarput, aammali ateq Pikialasorsuarmut uumasut issittumeersut pikialaffiannut attuumassuteqarsinnaammat minnerunngitsumillu Pikialaarfik Ilimmarfik aammalu Pinngortitaleriffik, imminnut tulluummata eqqaamioriillutillu, Emma Kristensen saqqummersitsinermi taamatut nassuiaateqarpoq .
Lene Kielsen Holm tassaavoq taamatut atsiussinissamu siunnersuuteqarsimasoq. Assit saviminermut naqitaapput eqqumiitsuliallu Age V. Jensenip aningaasaateqarfianit tunniunneqarlutik.