kultur
Assit takukkit: Isiginnaartitsinerup kingorna misigissutsimik kalluaasumik oqallittoqartoq
Isiginnaartitsissut Brønden Nuummi tallimanngormat ulikkaartumi takutinneqarpoq, arfininngornermissaaq isiginnaartitsinissamut billetit nungupput
Septembarimilu Sisimiuni isiginnaartitsinermik soqutigisallit pissanganartumik takusassaqarput.
Brønden isiginnaartitsisartut Teater Solarisip isiginnaagassiaraa qanilaartoq, Sisimiuni takutinneqartussaq, Nuummilu sapaatip akunnerata naanerani takutinneqarnerani isiginnaartitsisarfik ulikkaavippoq.
Nuummi tupaallannartumik tigulluarneqarpoq, arfininngormallu naggammik takutinneqarpoq.
Isiginnaartitsissut pikkunartoq
Brøndenimi Nukaka Coster-Waldau pingaarnertut inuttaavoq, isiginnaagassiarlu sakkortooq, meeqqanut inerteqqut, tarnikkut nappaateqarnermik persuttaanermillu imaqarpoq.
Josef Wolfugang Nielsenilu peqatigalugu Nukaka tallimanngornermi unnukkut Katuap isiginnaartitsisarfiani pikkunavissumik isiginnaartitsivoq.
Isiginnaariallu qallunaatut kalaallisullu pingaarnertut inuttaasut perulullutik silaarutaasartarneri tarnikkullu nappaatit pillugit pissutsinik atuuttunik oqaluttuat misigaat.
Isiginnaartut tarnikkut nappaatinik kanngusuuteqarnatik oqaluuserinnissinnaalernissaat anguniaagaasoq, isiginnaartitsinerup kingorna Sananda Solarisip oqaatigaa.
Isiginnaariat misigisaminnik annissisut
Isiginnaartitsinerullu kingorna isiginnaariat amerlanerit uninngallutik ilitsersuisoq isiginnaartitsisartullu oqalliseqatigaat, tassanilu kikkut tamarmik isiginnaartitsinermut qanoq isumaqarnerminnik avitseqateqarnissamik periarfissaqarput.
Amerlasuut inuttut attorneqarsimapput, ilaquttaminnullu tunngasunik oqaluttuarlutik, taamaattoqarneratalu unnuk kulturisiorfiusoq eqqarsaammernartumik naggaserpaa.
Brønden katuami arfininngornerup unnuani takutinneqarnermi saniatigut, Sisimiuni Taseralimmi septembarip arfineq aappaani takutinneqassaaq.