Atuakkiortut peqatigiiffiat eqqumiitsuliortut peqatigiiffiannit anivoq sakkortuumillu isornartorsiuilluni
Kalaallit Atuakkiortut Peqatigiiffiat Eqqumiitsuliornermi pinngorartitsisut ingerlatsisullu Nunatsinni kattuffiannut EPI-mut ilaasortaajunnaarpoq. Peqatigiiffik ukiuni arlalinni ingerlanerliorsimasoq isornartorsiuisut oqarput. EPI-p siulittaasua ugguarpoq suleqatigiinnerlu aallarteqqinneqarsinnaasoq neriuppoq.
Kalaallit Nunaanni Atuakkiortut Peqatigiiffiat sakkortuumik isornartorsiuilluni Eqqumiitsuliornermi pinngorartitsisut ingerlatsisullu Nunatsinni kattuffianni EPI-mi ilaasortaajunnaarpoq.
Kalaallit Atuakkiortut nalunaarummi allapput EPI ajoraluartumik tassaalersimasoq "kattuffik ‘qalasini kisiat isigalugu ingerlasoq’, kattuffik sanngiitsoq, siulersuisorisarsimasaasa suleqatigiissinnaasarsimannginneri peqqutigalugit".
Atuakkiortut peqatigiiffiat naapertorlugu ajornartorsiutit ukiuni arlalinni atuutereerput:
- Taamaattumik EPI ukiuni arlalinngortuni susinnaassuseqanngitsutut ingerlasimavoq. Tamakku peqqutigalugit Kalaallit Atuakkiortut EPI-mik tunuliaqutseeqqissinnaajunnaarput tunuarlutillu, Atuakkiortut peqatigiiffiat, Juaaka Lyberthimik siulittaasulik, taama nalunaaruteqarpoq.
Isornartorsiorneqarneq paasisinnaavaa
Atuakkiortut peqatigiiffiat naapertorlugu EPI iluamik nukittuumik inissisimagaluaruni politikkikkut oqalliseqataalluni eqqumiitsuliornermi pilersuisut ingerlatsisullu siunissamut ineriartorteqqinneqarnissaannut takorluuisinnaassuseqarluarluni politikkikkut ilusilersueqataallunilu oqalliseqataasassagaluarpoq.
EPI-p siulittaasuata Hans Jukku Noahsenip atuakkiortut peqatigiiffiata EPI-mit aninera uggoraa:
- Soorunami uggornarpoq KA-p tunuarnera, kisianni uanga isumaga naapertorlugu siulersuisuusimasut isornartorsiorneqartariaqarput.
- Isornartorsiuineq paasisinnaavara, siulersuisulli nutaat isornartorsiorneqartariaqarsimanngillat. Isumaqarpunga siulersuisunngortut suleqatigiilluarnerusut, suliniaqatigiiffiullu ersarinnerulernissaa sulissutigaarput, Hans Jukku Noahsen Sermitsiaq.AG-mut oqarpoq.
Aningaasaqarneq iluarsaanneqarpoq
Siulittaasoq naapertorlugu EPI-mi iluarsaassisoqarpoq, aamma aningaasaqarnermut tunngatillugu:
- Siulersuisunit tunuarsimasunit kingornussassarpassuaqarpugut. Ilaatigut naatsorsuutit tukattut, taakkulu itinerusumik oqaluttuarisinnaanngilakka. Maannali kukkunersiuisoqarpoq, taamaammat naatsorsuutit paasiuminarsarneqarnissaat sulissutigineqarpoq, Hans Jukku Noahsen oqarpoq, atuakkiortullu peqatigiiffiannik suleqateqaqqinnissani taassuma neriuutigaa:
- Tusagassiuutitigut KA isornartorsiuimmat tupaallaatigaarput. Matukkut kasuttoqqissagaluarpata oqaloqatigiinnissamut ammaniarluta piareersimavugut. EPI ingerlalluaqqilerumaartoq ilaasortatsinnullu katersortitsiviujumaartoq neriuutigalugulu sulissutigaarput.