Biskoppinngortussaq: Upperaara upperisamik nammineq aalajangersinnaassuseqarnerput

Paneeraq Siegstad Munkip biskoppissatut qinerneqarnini eqqissisimasumik tiguaa.

Ilagiinni taasisinnaasuni 254-iusuni affaat sinnerlugit Paneeqqap biskoppinngortussatut qinersimavaat. Taamaasilluni biskop Sofie Petersen 1995-imili biskoppinngorsimasoq soraarninngorpat taarsertussanngorpaa.

- Soorlu ukiortaami nerrivimmiit pissikkaangatta. Biskoppimut qinerneqarnera paasigakku taama misigivunga, Paneeraq Siegstad Munk oqaluttuarpoq. Taassuma ilanngullugu oqaatigaa maanna biskopiusoq Sofie Petersen ilagiinni sullissisimaneranut qujassutissaqarluni.

43-nik ukiulik Paneeraq Siegstad Munk Attumeersuuvoq. Arne Munk uigaa, marlunnillu erneqarluni. 15-inik ukiulimmik aamma 13-iliisussamik. Ilaqutai Bornholmimi najugaqarput.

- Aalajangersimavugut uanga Kalaallit Nunaanniissasunga biskoppinngorniarlunga anguniakkannik sulillunga, ilaquttakkalu Danmarkimiiginnassasut. Soorunami anaanatut artornartarpoq ernikka taama qimaqqasariaqarakkit, angorusutannik suligama, Paneeraq Siegstad Munk oqarpoq.

- Meeraaninniilli inuit ilinniarsimasut nuannaartorisarpakka. Ilinniagaqarlungali periarfissinneqarama, aamma uanga tunniussaqarusuttuuvunga. Perorsarneqarsimavunga akisussaaffimmik tigusiguma iliuuseqartussanngorlunga. Aamma biskopitut qinigaaninni takutikkusuppara nunaqarfimmiuugaluaraanniluunniit, angorusutaqaraanni anguneqarsinnaasoq, biskoppinngortussaq oqaluttuarpoq.

Tamat biibilimut assigiipput

Paneeraq Siegstad Munkip biibilimit allassimasut issuarlugit facebookimini ullut tamaasa ikkussisarpoq.

- Biibilimi oqaatsit uannut ullormi tassani tulluartut ujartarpakka, nassaarigaangakkillu facebookinnut ikkuttarlugit. Taama iliorlunga aamma ulloq nuannersumik aallartittarpara, Paneeraq Siegstad Munk nassuiaavoq.

Taassuma erseqqissarpa upperalugu ilagiinni ilaasortat tamarmik upperisamik killilerneqaratik toqqaasinnaassuseqartut. Aamma isumaqarpoq upperisamut tunniusimaneq qanoq naalangiakulatiginermi nalilersorneqarsinnaanngitsoq, taamaattorli inuunermi aqqusaangassat ilungersunarsinnaasut aqqusaarnerini upperisamut qanoq atassuteqarneq ersersinnaasartoq.

Taassuma ilanngullugu oqaluttuaraa suiaaqatigiit oqaluffimmi katisinneqarsinnaanerat illersortuarsimallugu, biibilimimi inuit tamarmik assigiimmata.

- Tamatta assigiimmik kuisinnitsinni pilluaqquneqarsimavugut. Illersortuarsimavara suiaaqatigiit upperisap saavani katisinneqartarnissaat. Eqqaamassavarpummi biibilimmi allassimasuni pilluaqqusinerpassuit amerlammata, taakkulu tamatsinnut atuupput, suiaassuserput, upperisarput, kinaanerput sumilu inunngornerput apeqqutaatinnagit, oqarpoq.

Ilanngullugu sulissutigiumavaa toqusoqarsimatillugu, soorlu imminut toquttoqarsimatillugu, ilagiit saaffigineqarsinnaaneri.

- Sulissutigerusuppara ilagiit qanoq aamma allatut atorneqarsinnaanerisa ilisimaneqarnerulernissaat. Soorlu toqusunit qimagaasut palasimik oqaloqateqarsinnaapput. Nipangiussisussaatitaavugut, aammalu saaffissaajuaannarnerput tatigineqartariaqarpoq, oqarpoq.

Ajoqit atugassaat

Biskoppitut sulileruni suliassatut siulliit ilaattut ajoqit atugassarititaat misissorumavai. Erseqqissaavoq imaassinnaammat ajoqit sulinerminni atugassarisanut naammagisimaarinnittut. Qanorli sulinikkut pitsanngorsaasoqarnissamik oqariartortoqassappat, tusarnaarsinnaaneq pingaartippaa:

- Nunaqarfinni ajoqit ilagiinni sulinerat pinngitsoorsinnaanngivipparput. Taamaammat ajoqit atugaasa paasiniarnissaat pingaartippara. Ajoqit atugassarisaat pillugit tusarnaarnissaq pisariaqarpoq, Paneeraq Siegstad Munk oqarpoq.

Paneeraq Siegstad Munk biskoppitut decemberip aallaqqaataani sulilissaaq. Biskopitut ivertitsinissaq 22. november pisussaagaluartoq, coronavirus pissutigalugu kinguartinneqarsimavoq.

Taanna erseqqissaavoq misilitsissutigisamini issuaasimasutut unnerluunneqarsimagaluarnini pisoq qaangiutereersoq, biskopitullu sulilernissaminut piareersimalluni.