Elektroniskimik nipilersortartoq nersornaaserneqartussatut innersuunneqartoq
Nunat Avannarliit Siunnersuisoqatigiivisa nipilersornermut tunniuttagaanut Andachan saqqummersitaanut 'Visualize Happiness'-imut innersuunneqarpoq.
27-nik ukiulik Anda Otto Schmidt, nipilersornermi Andachanitut ilisimaneqartoq, Nunat Avannarliit Siunnersuisoqatigiit Nipilersornermut nersornaasiuttagaanut ilaatigut 300.000 koruuninik naleqartumut nersornaaserneqartussatut innersuunneqarpoq.
Saqqummersitani Visualize Happiness innersuunneqaatigaa.
- Saqqummersitara taama maluginiarneqarsigissanersoq naatsorsuutiginikuunnginnakku innersuunneqarnera tupassutigaara. Mailikkut qaammat kingulleq paasitinneqarpunga innersuunneqarlunga, tamannalu tupassutigaara, Sermitsiaq.AG-mut oqarpoq.
Metalimit elektroniskimik nipilersornermut
Nipilersuusiortarnera nutaaliortuusoq, atugai nipilersuusiaalu ataqatigiittartut, Kalaallit Nunaannilu nipilersornermut ineriartorneranut peqataalluartoq innersuunneqarneranut ilaatigut oqaasertalerneqarpoq.
Saqqummersitaasa aapparaat, nipilersoriaaseq 'dubstep' aamma 'electronic dance music' atorlugit.
- Elektroniskimik siornatigut suliaqanngisaannarnikuuvunga. GU-mi Sisimiuni metalimik nipilersortartuni guitarertuunikuuvunga, nipilersoqatigiittulli avissaaratta eqqarsalernikuuvunga suna nipilersoriaaseq atulissanerlugu. Elektroniskimik nipilersuusiorneq aallutilerpara kisimiillunga, taanna aqqutigalugu tusarnaartitsisalersinnaanera anguniarlugu, Anda Otto Schmidt oqaluttuarpoq.
Nunani allani saqqumilaalernissaq
Nunat tamalaat akornanni nipilersortalerumalluni anguniagaqarpoq.
- Danmarkimi 2020-mi sumiiffinni assigiinngitsuni tusarnaartitsisareerpunga, festivalinili anginerulaartuni siunissami tusarnaartitsinissaq anguniagaraara. Taamaattumik nersornaaserneqarnissamut innersuunneqarnera maluginiarneqalernissannut iluaqutaasinnaammat nuannaarutigaara, oqarpoq.
Nuummi Akisuanerit Festivalimi Aasiannilu Nipiaa Rockfestivalimi nipilersornissani qilanaaraa.
- Coronaqarnera sivisunikooqaaq, taamaattumik tusarnaartitseqqittalernissaq qilanaarnaqaaq. Coronartoqarnerani Sisimiuni appisimaalaartarnikuuvunga, killeqarnikooqaarli, oqarpoq.
Nunat Avannarliit Siunnersuisoqatigiivisa nipilersornermut nersornaat Finlandip illoqarfiata pingaarnersaani Helsinkimi novembarip aallaqqaataani tunniunneqassaaq.