Kalaallit Nunaat Tivolimi 2017
Elsner Tivolimi tupaallatsinneqarluni qullilisoq
Nunatta avataani kalaallit naapeqatigiittarfiisa annersaani Kalaallit Nunaat Tivolimi, ingerlanneqaleruttorpoq, ataasinngornermilu nipilersortarfimmi qullineqaatigisumik tupaallatitsisoqarluni. Nipilersortarfimmiinnaanngitsoq, aammalu tusarnaartut akornanni.
- Ulluni makkuni inuit arlallit qiimaqaat nuannattoqaqalunilu, Kalaallit Nunaat Tivolimi, ullumi marlunngornermi nanginneqartussaq pillugu, projektleder Miki Jensen oqaluttuarpoq.
Ataasinngornermi silagissiorneq
Ataasinngonermi ulloq taamaat silagissiorfioqaaq, sivikitsumik siallillatsiarsimanera eqqaassaanngikkaani, naapeqatigiinnerlu danskit nutaarsiassaqartitsivianit soqutigineqarluartoq, Miki Jensenip paasissutissiaralugu oqaluttuaraa.
- TV2 Lorry minutsinik sisamanik sivisussusilimmik ilanngutassiisimavoq, tamannalu nuannaarutigeqaarput, Miki Jensen oqarpoq, Københavnillu qeqqani nunat tamalaat akornanni ilisimaneqarluartumut aliikkutarineqartaqisumut inuit qanoq amerlatigisut takkussimanersut suli ilisimanngilaa.
Frederik Elsnerillu tusaarnaartitsinerata nalaani tusarnaariat akornanni nipilersortarfissuarmi tupaallatitsinerit annerit ilaat pivoq.
Tupaallatsitsineq
Frederik Elsnerip naliginnaasumik angajunilu Christian Elsner atortagaat appisimaaleruttoraa, nipilersortarfiup tunuanit Christian nueriasaarpoq erinarsoqataalerlunilu. Frederiup ilisimasimanngilaa Christian illoqarfimmiittoq, angajunilu takullugu qullilerluni.
- Qatanngutigiit taakku takorniuunnerat takullugu nuannersumik attortinnarpoq, Miki Jensen oqaluttuarpoq, tusarnaartulli aamma qullileqataasimapput.
Ullumikkut atisat
Malunngornerup unnukkua silarlunnerusinnaavoq.
- Nalunaaqutaq arfineq missaani siallilernissaa ilimanarpoq. Tamanna pissutigalugu inuit sunik atisalersussanersut eqqarsarluarnissaannik kaammattorusuppakka, Miki Jensen kaammattuilluni oqarpoq, nuannerluinnartummillu Nuuk Posse aamma Enok Poulsen naggasiiumaartut neriorsuutigalugu.