Eqqumiitsuliortut aallarteqqipput: Tunumi seqersitanik takutitsineq
Eqqumiitsuliortut Tura Ya Moya containeriutilerlutik maanna Nunatsinni angalallutik aallarteqqipput. Seqersitakkat atorlugit illoqarfinni nunaqarfinnilu takutitsinerit qiimassaataassapput. Ulluni makkunani eqqumiitsuliortut Kulusummiipput, tassanilu ilaatigut meeqqanut inuusuttunullu qilaatersornermi pikkorissaasoqarpoq.
Seqersitakkat nipilersuutitallit Kulusummi Tasiilamilu qiimassaataassapput. Eqqumiitsuliortoq Qaanaameersoq Navarana Kavigak Sørensen ilaatigut qilaatersornermi ilinniartitsivoq, Karen Thastumilu Aabenraa-meersoq tusch-it atorlugit qalipaanermi eqqumiitsuliornermilu pikkorissaavoq.
Tura Ya Moya-p angalanerani siunnertaavoq eqqumiitsuliortut nunani avannarlerneersut kalaallillu eqqumiitsuliortut sumiiffinni assigiinngitsuni eqqumiitsuliortut inuusuttullu naapinnissaat. Ukiorlu manna angalanerini Imarsuaq - Havets Veje takutinneqartassaaq.
- Kusanartunik nuannersunillu qiimallatitsisinnaasunik takutitsisinnaanissarput neriuutigaarput. Inuusuttullu seqersitakkamik suliaqarneq soqutigissagaat neriuutigaarputtaaq. Eqqumiitsuliorneq misigissutsinik takutitsinermi atorneqarsinnaavoq nuannaarnermillu aamma aqqutissiuisinnaavoq. Taamaattumik suliniummik imaattumik suliaqarusussimavugut, eqqumiitsuliortut paasissutissiipput.
Seqersitakkat maanna Kulusummiipput marlunngornermilu septembarip 7-ani nalunaaqutaq 20.00 eqaarsaartarfimmi takutitsisoqassaaq. Kulusuup atuarfiata silataani nalunaaqutaq 20.30-imiit 22.30-ip tungaanut takutitsisoqassaaq. Eqqumiitsuliortut sapaatip akunnerata naanerani Tasiilamut apississapput. Qaqugu takutitsinissat meeqqanut inuusuttunullu pikkorissaanerit qaqugu pissanersut piaartumik saqqummiunneqarumaartut, Tura Ya Moya paasissutissiivoq.
Imaq pingaaruteqarpoq
- Isumaqarpunga sammisamik pingaarutilimmik toqqaasimalluta, imarsuup aqqusaartagai. Nunarsuarmi avannaanilu imaq inuunitsinnut inuussutissat uiguleriiaat eqqarsaatigalugit pingaaruteqarnerpaavoq. Ullumikkut inissisimanitsinnut inuit imarmi angallavigisimasaat pingaaruteqartorujussuuvoq. Imarsuaq pissanganartorujussuuvoq paarilluarneqartariaqarporlu, eqqumiitsuliortut allapput.
Eqqumiitsuliortut Kalaallit Nunaanut angalareersimapput, aatsaallu tunumiillutik. Suliniut Anersaaq - spirit of place Nuummi, Paamiuni Qaqortumilu 2016-imiit 2017-imut angallappaat.
Naammassillutik akiuussusersorneqartut kisiisa Tunumut angalanissaat Tura Ya Moyap aalajangiussimavaa. Taamaammat nunani avannarlerneersut eqqumiitsuliat aamma nassarsimallugit.
Imarsuaq Nuummi, Paamiuni Qeqertarsuatsiaanilu oktobarimi angalassapput. Angalanerat Norgemut Sverige-mullu ingerlaqqussallutik. Suliniut maannamut Nordisk Kulturkontakt-imiit, NAPA-imiit, Statens Kunstfond-imiit aamma Nunafondenimiit tapiiffigineqarpoq. Firmaet STARK har hjulpet os med at få containeren til Tasiilaq.