Filmimik angallassineq
Filmi uulikullannartuliaq Kujataani angallanneqassaaq
Kalaallit filmiliaannik uulikullannartuliamik ´Unnuap Taarnerpaaffiani´ sanasut apriilip 10-anniit filmi Kujataani angallatissavaat
Paamiormiut, Qaqortormiut, Narsarmiut, Nanortalimmiut Narsarsuarmiullu kalaallit filmiliaat uulikullannartuliaq qilanaarisinnaalerpaat.
Filmimik uulikullannartuliamik ´Unnuap Taarnerpaaffiani´ sanatut, ilitsersuisoq Malik Kleist siuttoralugu apriilip 10-anniit 27-annut filmi Kujataani angallanniarpaat, tamanna tusagassiorfinnut nalunaarutikkut paasissutissiissutigineqarpoq.
Filmip imarisaa
Filmimi oqaluttuarineqarput angutit inuusuttut marluk Minik aamma Hansi, ulluinnarni pissanganarmik amigaateqartut taamaattumillu aalajangertut illumi kalupittartumi unnuiniarlutik. Tamatuma kingorna filmi uulikullannaqisumik ingerlavoq.
Filmip akunnerup aappaata affaanik sivisussuseqarpoq akikitsumillu sananeqarluni. Aningaasarsiutiginagu isiginnaartitsisartut amerlanerpaat piumassutsiminnik peqataapput. Filmi katillugit 750.000 koruuninik akeqarsimavoq, filmiliortullu ukiut aappaata affaani sanasimavaat.
Filmi illoqarfinni makkunani takuneqarsinnaavoq:
Paamiut 10. aamma 14. apriilip akornanni
Qaqortoq 15. aamma 19. apriilip akornanni
Narsaq 20. aamma 22. apriilip akornanni
Nanortalik 23. aamma 26. apriilip akornanni
Narsarsuaq apriilip 27-anni
Tamatuma saniatigut filmimik angallassinermik aaqqissuussisut pilersaarutigaat filmi Avannaani angallanniarlugu, tamassumali aningaasalernissaa suli inissivissimanngilaq, tusagassiorfinnut nalunaarutikkut allassimavoq.