Hollywoodimi Kalaallit Nunaat takutitassiarineqartoq
Ajunaarnersuq pillugu Hollywoodimi filmiliami nutaami Kalaallit Nunaat isumannaatsumik inuuffissatut qitiutinneqarpoq, nunarsuup sinnera ullorissat anaannik seqummakunik toqussutaasinnaasunik nakkaaffigineqarnerani.
Filmi ”Greenland” tallimanngorpat unnukkut Katuami takuteqqaarneqassaaq, sisamanngormallu Danmarkimi tusagassiorfinnit arlalinnit nalilersorneqarsimalluni.
Coronap nunarsuarmi tuniluunnera pissutaallu filmip takueteqqaarneqarnissaa qaammatini arlalinni kinguartinneqartarsimavoq, maannali filmiliaritittartut Gerard Butler, Morena Baccarin aamma nukappiaraq Roger Dale Flyod inuttaralugit takutinneqartussanngorluni.
Pisimasuutitaq USA-mi filmiliarineqarpoq, timmisartoq inunnik aalajangersimasunik Kalaallit Nunaanni bunkerinut immikkut qimaaffissiatut sananeqarsimasunut qimarngussisussamik atugassiisimasumik.
Ilaqutariit annanniarlutik tamaviaartut
Pisimasuutitaq soorunami uivernersuarmik nassataqarpoq, ilaqutariillu timmisartumik annaffiusinnaasumut apuunniarsarinerat malinnaaffigineqarluni.
Berlingskemi filminik naliliisartup filmi ullorissanik marlunnik tunisimavaa, pitsaanerpaatut nalilerneqartut arfinilinnik tunineqartarput:
- ”Greenland”-imi oqaluttuarineqartoq ajoraluartumik ingasaanneqarsimavoq, tassani ilaqutariit pilluartuunissaasa qulakkeerniarneqarnerat takutinneqarugami. Naggataatigut nunarsuup aserornissaa utaqqiinnalersutut misinnartarluni. Tamannami anguniagaangunanngikkaluarpoq, Berlingske allappoq.
Ullorissat sisamat
Jyllands-Posten filmimik pitsaanerusumik naliliivoq, filmilu ullorissanik sisamanik tunillugu.