Ilinniartut Kangerlussuarmi akissutissarsisut
Qarsutsineq Kangerlussuarmi ajornartorsiutinik pilersitsisoq sumik nassuiaatissaqarpa? Kalaallit Nunaanni, Danmarkimi USA-milu ilinniarnertuunngorniarfinni ilinniartut 21-t ukioq manna Kangerlussuarmi aasaanerani atuartut tamanna akissutissarsiniarlugu paasiniaapput
Sermitsiaq.AG nalunaarusiamik tulliuttumik Sasha Kleist Sethsenimit Kangerlussuarmi aasaanerani atuartut 21-t - qarsutsinermilu imerujussuup suminngaanneerneranik paasiniaasut ilaannit tigusaqarpoq.
- Ilisimatooq Asa Rennermalm peqatigalugu erngup kuutsigut kuuttup annertussusaanik uuttortaavugut ukioq mannalu siornatigumut sanilliullugu erngup kuuttup annertunerunera uuttorlugu. Ukioq manna kuuk aatsaat taama sakkortutigisoq paasinarsivoq, kuuttunerpaaffialu aatsaat aggustimi nalliuttoraluarpoq. Sermersuarmiinnitsinni 3 meterinik itissusilimmik qillerivugut sermip qanoq sukkatigisumik aakkiartornera alaatsinaanniarlugu. Ilisimatooq qaammatip ataatsip matuma siorna assingusumik qillerisimavoq qillikkaminullu bambusimik ikkussilluni. Taanna alakkaratsigu sermeq 2 meterit sinnerlugit issussusilik qaammatip ataatsip ingerlanerani aassimavoq, Sasha Kleist Sethsen Sisimiuni HTX-imeersoq oqaluttuarpoq.
Imerujussuaq Sermersuup ilaanit annertoorsuarmeersoq Kangerlussuup kuuanut Watson Riverimut kuuttarpoq.
- Aasaanerani atuarnitsinni NASAp sermersuarmik qulaavaalluni uuttortaasarnera aamma tusagaqarfigaarput. Semersuaq issutsikkiartornersoq saaliartornersorluunniit uuttortartarpaat.
- Sermersuarmi minutsini 30-ni pisulluta timmukarpugut. Sermersuarmiinnitsinni oqarasuaatiga angallattagaq attaveqarpoq taavalu anaanaga Uummannamiittoq aatagalu Kangaatsiamiittoq sianerfigaakka. Tulluusimaarpaluppoq. Aasaanerani atuarnermut peqataanissaq toqqarsimagakku uanga aamma tulluusimaarutigaara. Qinikkama pitsaanerpaartaasa ilagaat. Neriuppunga ilikkakkavut tamaasa eqqaamasinnaassallugit ilinniaqqinninnilu atorsinnaassallugit. Aamma inuttut ineriartorninnut.