Ilitsersuisoq: Filmip saqqummivinnissaanut qilanaarpunga

Filmi ‘Anori’ arfininngormat Nuuk International Film Festivalimi takuteqqaarneqarpoq. Isiginnaariat filmimut kajumipput. Kisianni isiginnaarnerup aamma isiginnaartitsereernerup kingorna kajuminneq kisimi takussaanngilaq. Anorip aamma Inuup nuanninngitsumik asanninnerannik oqaluttuaq erseqqissumik eqquivoq.

- Inuiat assorsuaq nuannarimmassuk aamma tupaallannerat nuannaarutiginerpaavara. Tassami oqaluttuap pissanganaannavinnissaa siunertaraara, filmip ilitsersuisua Pipaluk Kreutzmann Jørgensen, Sermitsiaq.AG-mut oqarpoq.

Filmilli ataasinngorpat kisimiilluni Katuami takuteqqaarneqarnissaa qilanaaralugu, taassuma oqaatigaa.

- Saqqummivinnissaa qilanaaraara, neriuutigaaralu sapinngisamik amerlanerpaat takujumaaraat. Tassami aatsaat tassani qisuariaatit malugisinnaassavakka.

Aappariinneq nuanninngitsoq

Pipaluk Kreutzmann Jørgensenip suli pissangassuteqanera, filmip ukiuni arfineq-pingasuni suliarisimaneranik pissuteqarpoq. Isumassarsiaq piffissami tassani inissisimaffianit aallartippoq.

- Inuuninni ajornakusoortumik aqqusaagaqarpunga, tassani aappariinnerliornermi inissisimallunga. Piffissaq taanna sakkortullunilu ingasappoq.

Aallaqqaammut asanninneq nuannaarfiunngitsoq pillugu oqaluttuaq isiginnaagassianngorniarlugu eqqarsaatigaa. Kingorna naatsumik filmilianngorpoq, taamaalillunilu aningaasanik tapiiffigineqarnissani angullugu.

- Naanera qanoq issanersoq aamma qanoq aallartissanersoq ilisimajuaannarpara.

Qaamaneq taartorlu

Kisianni oqaluttuap oqaluttuarinissaanut piffissaasimanngilaq. Piffissamilu tassani aappariinnerliornermi suli inissisimavoq. Filmimi naatsumi oqaluttuaq taartorujussuuvoq. Kingornalu qaammariartulersimalluni.

- Ingerlanerani taarpallaarunnaariartorpoq. Kisianni taartortaa ilanngukkusussimavara – isumassarsiaraaralu New York taartutut inuttut aamma nunatut ilisarnaatitut atorniarlugu. Tassani New Yorkip illorsuanut apummit ersarissumut akerleriisillugit.

Tamatuma kingorna ullut quliinnaat atorlugit manuskripti allappaa.

Nûkaka Coster-Waldau inuttaliullugu, inuttaq pingaarneq eqqortoq, Anori, pitsaasumik asanninnermut upperinnittoq nassaaraa.

- Minguissuseq aamma uppiasuuneq takutissinnaavaa, tamannalu maani pinngortitami aamma tulluartorujussuusoq misigisimavunga. Maani nuna kusanartoq sequmiasuullunilu peqqarniimmat, Pipaluk Kreutzmann Jørgensen nassuiaavoq.

Filmiliortut ilungersortut

Nûkaka Coster-Waldauip filmip piviusunngortinnissaa peqataanerminut akissarsinnginnermigut taperserpaa.

- Akissarsiaqarani sulinissani toqqarmagu suliamut tunissutaavoq.

Tassami aningaasartaqarpallaanngilaq. Tassami filmimut piffinni assigiinngitsorpassuarni immiussamut 1,4 millionit koruunit amerlanngillat. Peqataasut tamarmik sapaatip-akunnerini arfinilinni immiussinermi sivisussusilimmi ilungersornerisigut taamaallaat pisinnaasimavoq. Amerlanertigut ullaakkut nalunaaqutaq tallimaniit unnukkut unnuap qeqqata tungaanut sulisarput. Assigiinngitsorpassuit malaatiinnarlugu suliarineqarput, assersuutigalugu inuit mittarfimmi naapitat filmimut ilaarusunnersut aperineqartarlutik.

- Filmiliorfimmiipputit, taava inuit qanoq ilaatissinnaanerlugit paasissavat.

Taamaaliornikkut filmimi illuanik kalaallit oqaluttuatoqqanik ileqqunik takussutissaqartoq aamma illuanik nutaaliaalluni.

Nunatsinni takutitsinerit saniatigut, Pipaluk Kreutzmann Jørgensenip nunani tamalaani filmfestivalini takutinnissaa siunertaraa. Oktobarip naanerani Torontomi ImageNativemi takutinneqartussaavoq.

Anori oktobarip aallaqqaataanit 24-ata tungaanut takutinneqassaaq. Novembarimilu sinerissami illoqarfimmi takutinneqassalluni.