"InterAir Pas" inuusuttunik angalarusutsitsilissaaq
Interrailimut assigusumik aaaqqissuussinerup inuusuttut Savalimmiut, Islandip Kalaallillu Nunaata akornanni aalajangersimasumik akisuallaanngitsumillu akilimmik angalasinnaanngortissavai, Nunat Avannarliit Killiit Siunnersuisoqatigiiffiat siunnersuuteqarpoq
Nunat Avannarliit Killiit Siunnersuisoqatigiiffiata siunnersuuteqarnermigut, inuusuttut Savalimmiuni, Islandimi Kalaallillu Nunaanni angalanissamut misigisassarsiornissamullu periarfissinniarpai:
- Nunagisat, kulturit inuillu tikillugit misigisaqartarnerup nunat akunnerminni ataqatigiinnerat, suleqatigiinnerat peqatigiittarnerallu nukittorsartarpai.
Siunnersuut Inatsisartut upernaaku ataatsimiinneranni suliarineqassaaq, tassani Inatsisartut isumassarsiamut peqataatinneqassallutik.
Isumassarsiami anguniarneqarpoq, nunani taakkunani pingasuni naalakkersuisut interrailimut assigusumik aaqqissuussisoqarsinnaaneranik misissuinissaat.
Timmisartuutileqatigiiffiit taperserneqartariaqartut
Nunani avannarlerni killerni inuusuttut aaqqissuussaq aqqutigalugu periarfissinneqassapput, nunani avannarlerni killerni aalajangersimasumik akisuallaanngitsumillu akilimmik piffissami killilikkami angalasinnaanissamut:
- Interrailimut assigusumik aaqqissuussinikkut, immaqalu InterAir Pasimik aqqissuussinikkut, Nunani avannarlerni killerni inuusuttut periarfissinneqassapput, qaammaassaminnik ilisimasaminnillu annertunerulersitsinissamut, inuuneq naallugu attaveqaateqalernissamut aamma nunat avannarliit killiit suleqatigiinnerannut iluaqutaasumik ikinnguteqalernissamut, Siunnersuisoqatigiit siunnersuutertik pillugu allapput.
Siunnersuisoqatigiit aaqqissuussaq taamatut ittoq qanoq akeqassanersoq oqaatiginngilaat, naalakkersuisunulli kammattuutigaat, siunnersuut aningaasanik annaasaqarnermik kinguneqassappat timmisartuutileqatigiiffinnut tapersiissuteqaqqullugit.
Tamanna pisinnaanngippat siunnersuisoqatigiinnit siunnersuutigineqarpoq, angalanissamut legatimik Kalaallit Nunaanni, Islandimi Savalimmiuniluunniit inuusuttut qinnuteqarfigisinnaasaannik naalakkersuisut pilersitsissasut.