Kalaallit Nunaat Tivolimi
Kalaallit Nunaat Tivolimi: Ukioq manna programmigissaaqaagut
Kalaallit Nunaat Tivolimi-mik ingerlatsisuupput kajumissutsiminnik sulisut pingasut, taakkualu kalaallit ulluisa Tivolimi ingerlanneqarnissaat pilersaarusiortarpaat. Ukioq mannalu programmiliartik naammagisimaarluarpaat
Kalaallit Nunaata avataani kulturikkut pisoqartitsinerit annersaannik, Kalaallit Nunaat Tivolimi, pilersaarusiortut isumaqarput ukioq manna programmimik pitsaalluartumik katiterisimallutik. Naatsorsuutigaallu ulluni juulip 31-anni aggustillu aallaqqaataani kulturikkut pisoqartitsinermi pisoqarfiulluartartumi inuppassuarningaasiit takkuttoqassasoq.
– Isumaqarpunga ukioq manna programmigissaaqaluta, ukioqatigiinnut tamanut nipilersukkanik assigiinngitsunik nipilersortoqassalluta, Miki Jensen, Kalaallit Nunaat Tivolimeersoq oqarpoq. Taanna oqaluttuarpoq ilaatigut oqaluttuatoqqanik atuaasoqassasoq aammalu Hinnarik Frederik Elsnerilu meeqqanik aliikkusersuissasut, inuusuttunut Small Time Giants, Uyarakq aamma Nikolaj Lønstrup. Inersimasuunerusunullu Simon Lynge, Nanook, Kimia pingaarnertullu nipilersortussat Ulf Fleischer aamma Paarisa Band nipilersussasut.
Ukiut tamaasa nutaat
Kalaallit Nunaat Tivolimi-mik pilersaarusiortut ukiut tamaasa nutaaliorniartarput, ukioq mannalu nutaatut Koncertsalen ataani Akavariet-imi oqaluttuatoqqanik atuaasoqassaaq DJ Uyarakq-llu electro-mik nipilersussalluni.
Kalaallit Nunaat Tivolimi-mik kajumissutsiminnik pilersaarusiortut tassaapput Miki Jensen, Pilaluk Lund aamma Kim Falck-Petersen, taakkualu ukiuni kingullerni pingasuni pilersaarusiortarsimapput. Miki Jensen Sermitsiaq.AG-mut oqaluttuarpoq pilersaarusiortut pingasut ullut 14-ikkaarlugit naapeqatigiittartut pisoqartitsinissarsuarlu pilersaarusiorlugu.
– Pisussat pilersaarusiortarpavut assersuutigalugulu nipilersortartut nipilersortorerusutavut attavigisarlutigit, Miki Jensen oqaluttuarpoq.
Tamanna peqatigalugu erseqqissarpaa nipilersortartut amerlanerpaat, Kalaallit Nunaat Tivolimi nipilersortussat, angalanissaminnut namminneq aningaasaateqarfinnut qinnuteqartartut. Siusinnerusukkut aningaasaleeqataasut nipilersortartut angalanerat akilertarsimavaat. Taamaasiornikkulli pilersaarusiortut nipilersortartullu suleqatigiinnerat ingerlalluarpoq, Miki Jensen oqaluttuuarpoq.
Kalaallit Nunaat Tivolimi-mi pingaarnerusutut siunertaavoq nipilersornikkut, eqqumiitsuliornikkut, filmiliornikkut, nerisassatigut atisatigullu Kalaallit Nunaannik kalaallillu kulturiannik ilisimasaqarnerup siammarsarnissaa.