Kalaallit Savalimmiormiullu FM-imi ilaasortat Atlantikup avannaa pillugu avitseqateqarniartut
Københavnimi innuttaasut Kalaallit Nunaat Savalimmiullu pillugit sisamanngornermi Danmarkimi oqallittoqarnissaanut qaaqquneqarsimapput.
Folketingimi ilaasortat Aaja Chemnitz Larsen aamma Edmund Joensen Savalimmiuneesoq Københavnimi Kalaallit Illuani oqallittoqarnissaanut qaaqqusisimapput, tassani Kalaallit Nunaata Savalimmiullu Danmarkimi ilisimasaqarfigineqarnerulernissaat pillugu sammisaqartoqassalluni.
IA Folketingimi tusagassiorfitsigut nalunaaruteqarluni taamatut allappoq.
Kalaallit Nunaanni Savalimmiuniillu sinniisuutitat inuillu suliamut ilisimasallit saqqummiissapput, kiisalu folketingimi ilaasortat Aaja Chemnitz Larsen, Edmund Joensen, Kasper Roug, Christoffer Melson aamma podcastimik maanna ingerlatsisoq Christian Jeppesen oqallitsitsissallutik.
- Misilittakkatta takutippaat, immitsinnut ilisarisimanerugaangatta immitsinnullu soqutigaangatta isummanik pigiliutiinnakkanik atuinikinnerullutalu kinaassusersiunnginnerusartugut, tamannali nammineerluni takkunneq ajorpoq, Aaja Chemnitz Larsen oqarpoq, nangillunilu:
Isummat pigiliutiinnakkat atorunnaarneqarsinnaasut
- Danmarkimi Kalaallit Nunaat pillugu ilisimasat saqqummiunneqaraangata qanga inuusaaseq ukkatarineqarnerusarpoq, ullutsinnilu inuiaqatigiit nutaaliaasut pineqarpallaartaratik. Tamanna allanngueqataaffigerusuppara. Taamaammat oqallitsitsinermi ilisimasat pillugit unammissutsissamik suliaqarsimavunga, oqallitsitsinermi saqqummiussassannik.
Oqallitsitsinissamik aaqqissuussisimasut ilisimasaqarnerunikkut oqaloqatigiinnerusarnikkullu isummat pigiliutiinnarneqarsimasut kinaassusersiortarnerlu atorunnaarsikkkusuppaat.
Ullumi nal. 16-18.00 Københavnimi Kalaallit Illuanni oqallitsitsineq ingerlanneqassaaq.