Katersugaasiviit seminareqartinneqarput
Illoqarfiit aqqanillit katersugaasiviinnit aallartitat Ilisimatusarfimmi Kalaallit Nunaata kulturikkut oqaluttuassartaannik seminareqartinneqarput
Kalaallit Nunaanni Katersugaasiviit pillugit ataatsimiititaliaq Ilimmarfimmi Inuiaat Piorsarsimassusaannut Oqaluttuarisaanerannullu ilisimatusarfik suleqatigalugu nunatsinni katersugaasivinni sulisunut seminareqartitsipput. Seminareqartitsinermi katersugaasiviit aqqanillit peqataatitaqarput. Taama Kalaallit Nunaanni Katersugaasiveqarneq pillugu ataatsimiitaliamit Aviâja Rosing Jakobsen tusagassiutinut nalunaaruteqarpoq.
Seminareqartitsineq Ilisimatusarfimmi septembarip 26-aniit 30-at ilanngullugu ingerlanneqassaaq.
Seminareqartitsinermi siunertaavoq katersugaasivinni sulisut Kalaallit Nunaata kulturikkut oqaluttuassartaannik ilisimasaqarnerulernissaat kiisalu katersugaasivinni sulisut paasissutissat nutaarsiassallu pissarsiatit tunngavigalugit namminneq suleriaqqinnissaannut sakkussaqartilernissaat, siulittaasoq paasissutissiivoq.
Tamatuma saniatigut peqataasut katersugaasivinni sulinerminni misilittakkaminnik avitseqatigiinnissamut oqallinnissamullu periarfissaqassapput.
Nunatta Katersugaasivia Allagaateqarfialu aamma Ilisimatusarfimmi Inuiaat Piorsarsimassusaannut Oqaluttuarisaanerannullu immikkoortortamit kiisalu illukusiooq Jens Fog Jensen, Danmarks National Museumimit oqalugiartoqassaaq.
Ilaqutariinnermut, kulturimut, oqaluffinnut aammalu naligiissitaanermut naalakkersuisoq Mimi Karlsen, seminarimik ammaalluni oqalugiassaaq.