Katuaq: Dronningimut qujassuteqarsinnaavutit
Kulturip illorsua Katuaq kunngikkormiuni kinguaariit nikinnerannut tunngatillugu sapaatiuppat kaffellissaaq, Dronningillu kulturip illorsuanut illersuisuusimanera pillugu qujassuteqartoqassalluni.
Kulturip illorsua Katuaq Nuummi innuttaasut Danmarkimi kunngikkormiuni kinguaariit nikinneranni kaffellissaaq.
Kaffellerneq sapaatiuppat nal. 10.00-imiit ualikkut nal. 17.00 tungaanut ingerlassaaq. Dronning Margrethemullu qujassuteqarusuttut aamma periarfissinneqassapput.
- Katuami ‘pulaat’ allattorsimaffiannik saqqumisitsisoqassaaq, tassungalu Dronningimut qujassuteqarlutik innuttaasut allagaqarsinnaassapput, taanna kingusinnerusukkut Dronningimut nassiunneqassammat. Periarfissiisoqassaarlu Dronningip Nuummut nunatsinnullu tikeraartarnerinik inuit immikkut namminneq misigisaqarsimasut oqaluttualaartinneqarnissaannut, Katuaq ilisimatitsivoq.
Ataqqinartorsuup Katuamut illersuisuusimaneranut qujassuteqarlutik, Katuap sinnerlugu, Siulersuisut allagaqarsimapput.
Katuamut illersuisuusimasoq
Kulturip illorsua Katuap Dronning Margrethe, januarip 14-ani dronningitut tunuartussaq, kunngeqarfimmillu kinguaariinni tullermut, Kunngissaq Frederimmut, akisussaaffimmik tunniussisussaq, qujassutissaqarfigingaatsiarpaa.
Dronning Margrethe Katuap 1997-imili atulerneranit illersuisutut inissisimasimavoq.
Dronning Margrethe nunatsinnut tikeraarnerminut atatillugu Katuami aaqqissuussanut arlalinnut peqataasarsimavoq.
- Dronningimut Katuaq qujassuteqarniarluni Nuummi innuttaasunut kaffillerniarpoq, pisussamittaaq Københavnimi pisut TV-kut malinnaavigineqarsinnaassallutik, Katuaq allappoq.
1968-ernisat katersuutissapput
Kunngissap Kunngi Frederik qulingattut taaneqarnera aamma immikkut malunnartinneqassaaq. Kunngissaq Frederiup peqaavi Katuami katersuutissapput assiliseqatigiillutillu, assilu kunngikkormiunut tunissutitut nassiunneqassalluni, Katuaq ilisimatitsivoq.
Danskit TV-qarfii nunatsinni pisunut malinnaassapput, soorlu aamma Sermitsiaq.AG malissaasoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...