Maliina kakiortinnertut
Københavnimi ukiumoortumik kakiuinermik takutitsineq ippassaq ammarmat københavnimiunut untritilikkaanut najoqqutat mikisut angisuullu kakiorneqarput, ilaatigut kalaallit seqinermik oqaluttuatoqaat
Københavnimi Ny Carlsbergvejimi Carlsbergip maqitsinermut inersuisa isaariaani kinguleriiaartorpassuaqarpoq. Utoqqaat inuusuttullu, inuinnaat tusaamasallu, angisuut mikisullu kakiuisartunit ilisimaneqartunit kakiortinniarlutik tulleriiaarput. Kakiuisartut untritilikkaat akornanniipoq islandimiu Jon Pall, Reykjavikimi kalaaleq Lene Mar Spore peqatigalugu aallaavilik.
- Kalaallit seqinermik oqaluttuatoqaat Jon-imut titartartippara, Lene Mar Spore Sermitsiaq.AG-mut oqaluttuarpoq.
- Maliina seqininngorami timaa nakkarpoq, nakkarneralu titartartissimavara. Kalaallit naasuinik titartakkat qalipaatillit nassarsimavakka, Jon-illu titartakkaminut ilannguppai, Lene Mar Spore oqaluttuarpoq kakiuisartup talimigut meqqutinik kapooraani.
- Annernarpa?
Lene Mar Sporep kigutini kiivai niaqqunilu sikisaartillugu. Kakiortinnera akunnernik arfinilinnik affarmillu sivisussuseqarpoq.
Kakiortinneq akunnermut 1.100 koruuniniit 1.600 koruuninut akeqarpoq. Kakiuinermik takutitsineq Copenhagen Ink Festival ukiut pingajussaa tulleriisiinnarlugu ingerlanneqarpoq arfininngorpallu naassalluni.
Kalaallit oqaluttuatoqaat malillugu qatanngutigiit Maliina, seqininngortoq, Aningaarlu, qaammatinngortoq, imminnut malersuupput.