NAPA ilisimaneqarusuttoq
NAPA – Nunani Avannarlerni Piorsarsimassutsikkut Attaveqaat – piffissami aggersumi nuna tamakkerlugu angalanissaminik pingaartitsinerminik sukumiinerulersitsiniarpoq, nunani avannarlerni ataatsimooqatigiiffimmi periarfissat pillugit paasissutissiiniarluni.
Kalaallit Nunaanni inuusuttuulluni Sverigemi akileraartarnermut maleruagassat imaluunniit Finlandimi erninermut atatillugu sulinngiffeqarnermut periarfissat paasisimalernissaat ajornakusoorsinnaavoq. Tamakkununngali Nunani Avannarlerni Piorsarsimassutsikkut Attaveqaat aqqutigalugu ikiorneqarnissaq ajornanngilaq, tamakkualu paasititsiniutigineqarniarput, periarfissat amerlanerusunit atorluarneqalersinnaaqqullugit, oqaatigineqarpoq.
- Kalaallit inuusuttut nunani avannarlerni arfineq-pingasuni tamani sulinissamut ilinniagaqarnissamullu periarfissaqarnerminnik ilisimasaqalernissaat pingaaruteqarpoq, NAPA-p pisortaa, Anne Mette Gangsøy, oqarpoq.
NAPA-p paasissutissiisarnermut kiffartuussivia ’Info Norden Grønland’ aqqutigalugu innuttaasut nunani avannarlerni tamani nuunneq, sulineq ilinniagaqarnerlu pillugit apeqqutinut akissutisisinnaapput.
Kulturikkut suliniutinut tapiisartoq
Tamatuma saniatigut innuttaasut NAPA tigussaasumik atorsinnaavaat, kulturikkut suliniummut nunanut avannarlernut attuumassutilimmut, meeqqat inuusuttullu imaluunniit inersimasut peqataaffigisinnaasaannut, isumassarsiatsialaateqarunik.
NAPA kulturimut tapiissuteqarnermut aaqqissuusseriatsini aqqutigalugu suliniummut tapiissuteqarsinnaavoq imaluunniit nunani avannarlerni tapiissutinik allanik qinnuteqarnermi ikiuussinnaalluni.
- Suliniutinu, nunani avannarlerni meeqqanik inuusuttunillu peqataatitsisunik siunnerfilimmik suliaqartarpugut.
Kalaallit inuusuttut nunani avannarlerni inuiaqatigiit pilugit oqallinnermi pingaarutilimmik nipeqarput, nunanilu avannarlerni ataatsimooqatigiiffimmi tusaaneqarnissaat siunissamut pingaaruteqarpoq. Nuup Kujataanilu nunaqarfiup Aappilattup akornaanni illoqarfinni nunaqarfinnilu assigiinngitsuni 15-ini innuttaasut NAPA sapaatip-akunnerini tulliuttuni marlunni naapissinnaavaat.
NAPA-p ilisimaneqarnerata siammarternissaa nunanilu avannarlerni ataatsimooqatigiiffimmi periarfissanik soqutiginnittut ilitsersornissaat siunertaavoq. NAPA angalanermini Kalaallit Nunaanni innuttaasutut nunani avannarlerni periarfissarineqartorpassuarnik paasititsiniaassaaq.
NAPA-p paasititsiniaalluni aggustip 31-anit septembarip 11-anut angalassaaq.