Unnuk kulturisiorfik
Narsami unnuk kulturisiorfik iluatsilluartoq
Silap issikinnerata allaaqqinneratalu Narsarmi innuttaasut kulturisiorfimmi alakkarneqarsinnaasunut ornigaalluarput
Unnuk kultiurisiorfimmi narsarmiut alakkagassaaleqinngillat.
Qatserutaasivik siullerpaalluni nalunaaqutaq pingasunut matuni ammarpai. Sinnerilu arfineq-marluk qulingiluallu akornanni alakkarneqarsinnaanngorlutik.
Peqqinnissaqarfik katersortarfimmi pinaveersaartitsinermut inooriaatsillu kinguneranik nappaatit pillugit paasitsitsiniaapput. Alakkaasullu aammi sukkoqassuseq, aap naqitsinera, oqimaassuseq qitillu silissusaa uuttortartissinnaasimavaat.
Lulu R. Olesen Martine Frederiksenilu aamma katersortarfimmeeqataapput, taakkua peqatigiiffik Neriuffiup ikinngutai aallartisarnerani ilaasonngorusussinnaasunik pilerisaaralutik. Peqatigiiffik nappaammik kræftimik eqqugaasunut ikiuisartuussaaq.
Taakkua saniatigut Henrik Malene Lundillu illuanni erinarsoqatigiit appisimaartut, sanaluttartut sannavianni Mukumi takornariarneq, katersugaasivimmi isiginnaagassiaq A21 aallakaatinneqartoq, kaffi utoqqaat angerlarsimaffianilu takornariarneq alakkarneqarsinnaasimallutik.
Kommunip allaffiani Nem ID-mut ikiortittoqarsinnaavoq, inuusuttut klubbiat Qaqqavaarsuk nipilersukkanik aliikkusersuivoq Royal Arctic Linemilu talittarfimmi takornariartitsisoqarlunilu balloninik, erfalasooqqanik qarlortaatinillu agguaasoqarpoq.
Alakkagassanilu nuannarineqarnerpaavoq ukiup siulia assiagalugi inussutissanut ilinniarfik Inuili. Tassani ilinniartitsisut ilinniartullu kalaalimernginit nerisassiat misilinneqarsinnaasorpassuit sassaalliutigaat.
Meeqqallu iffiortumit Andersonimit ikiorneqarlutik namminneq kaagit pinnersarlugit. Tamanna nuannarineqarluarpoq.
Pisut tamaasa isigalugit unnuk kulturisiorfik iluatsilluartutut taaneqarsinnaavoq.