Nina: Melodi Grand Prix-imi peqataaqqissanngilanga
Melodi Grand Prix-imi peqataareerluni Nina Kreutzmann Jørgensen Nuummut angerlarpoq ullumi marlunngornermi. Assit takukkit
- Taama silaqqitsigisumi ikinngutinnit tikilluaqquneqarluni nuaan. Maanna Melodi Grand Prix-imi peqataanikuullunga qulakkeerpara, nipilersornermi angusanni ilaalerpoq.
Nina Kreutzmann Jørgensen Nuummut tikeqqammerluni Sermitsiaq.AG-mut oqarpoq. Taanna Melodi Grand Prix-imi Julie Berthelsen peqatigalugu arfininngormat peqataavoq, unamminermi aappaattut inissillutik.
Misigisaq nuannersoq
Tikinnermini ikinngutiminit tikilluaqquneqarpoq nersorluarneqarlunilu.
- Unammisitsinermi peqataaneq nuanneqaaq, misigisaq tupinnaqaaq. Aamma kaammattorluarneqarujussuarpugut tupinnaannartumik - illersorluarneqarnerput malugikutsoorparput. Unoqatinut attaveqaatitigut allaffigineqaqattaarpugut illersorneqarluarluta, tamanna tuppallernartupilussuuvoq, oqaluttuarpoq.
- Aappaattut inissinnersi qaangerpiuk?
- Aap, ingerlatiisaannaq qaangerpara. Tassa misigisassara misigereerpara. Tassami peqataannginnitsinni piareersarsuaarpugut, suliaqarluta arlariinnik aamma tusagassiortorpassuarnik oqaloqateqarluta. Maannakkut angerlarluni iluaqaaq, kiisami eqqissisimaarsinnaanngorpunga, akivoq.
Nina Kreutzmann Jørgensenip Melodi Grand Prix-imi peqataaqqinniarnani oqarpoq.
- Taamaattoq nipilersortartut erinarsortartullu kaammattorusuppakka erinnanik aaqqissuisunut nassiusseqqullugit. Peqataalluni ila nuanneqaaq, misigisaqarnaqaaq, kisianni peqataaqqinnianngilanga siunissami, Nina Kreutzmann Jørgensen oqarpoq.