Atuakkat
Nunani Avannarlerni atuakkiortunut nersornaammut innersuutsittoqanngitsoq
Ukiuni marlunni tulleriinni innersuussisoqarnerata Nunani Avannarlerni Siunnersuisoqatigiit atuakkiortumut nersornaasoqartarnerata kingorna, ukioq manna uninngagallartoqarpoq
2014-imi Niviaq Korneliussenip atuakkiaqqaataa 'Homo Sapienne' innersuunneqarpoq, taanna naliliisartunit atuartunillu nersualaarneqarluarpoq.
Ukiup tulliani Nunani Avannarlerni Siunnersuisoqatigiit atuakkiortumut nersornaasiuttagaanut innersuunneqarpoq.
2016-imilu Sørine Steenholdtip atuakkiaa 'Zombiet Nunaat' aamma innersuunneqarpoq. Taannalu aamma atuakkiaqqaatigalugu nersornaammut akimasumut innersuunneqarpoq.
Kisianni ukiormanna innersuunneqartut 12-it akornanni kalaallinik atuakkiortunik toqqagaasoqanngilaq.
Illuanik Sissal Kampmann Savalimmiuneersoq qiimmassarneqarsinnaavoq, taassuma taalliat katersugaatai 'Sunnudagsland' innersuunneqarput. Nunat eqqaamiuusoq Island, Linda Vilhjálmsdóttirip aamma Guðmundur Andri Thorssonip innersuunneqarneranik marlunnik peqataasoqarpoq.