Nunatta Isiginnaartitsisarfia nutaamik akunnerminneersumik pisortartaalerpoq
Vivi Sørensen Nunatta Isiginnaartitsisarfiani pisortanngussaaq. Siulersuisut marlunngornermi tusagassiuutinut nalunaarummi taama ilisimatitsipput.
Nunatta Isiginnaartitsisarfiata siulersuisuisa qinnuteqartut piukkunnarluartut akornanni pisortaasussatut atorfinittussaq isumaqatigiissusioqatigeqqammerpaat. Siulersuisut marlunngornermi taama nalunaaruteqarput, Vivi Sørensenip toqqarneqarnerani takorluugaqarluarnera tunngavilersuutigineqarpoq.
Taassumalu ullutsinni isiginnaagassianut isiginnaariartartunut isiginnaagassianik pilersitsinissaq suliassarissavaa, kisianni aamma isiginnaagassiortarnermut ilisimanninnerup siammarternissaa kiisalu kinguaariinnut nutaanut saaffiginnilluni, isiginnaartitsisarfiullu imminut tuniniarluarnissaanik qulakkeerinnissaaq.
Akisussaaffik nuannaarutigilluinnaraa
Vivi Sørensen nunatsinni isiginnaartitsinermi ilinniartitsinermik, ilinniakkap aaqqissuunnissannut isiginnaagassiorsinnaanermik taassumalu iluani aqutsinermik misilittagaqarnerpaajuvoq.
- Nuannaaqaanga uummateqarfigilluinnagara atorfittaarigakku; pisinnaasakka, nunatsinni nunarsuarmilu attavikka, misilittakkakka ilinniakkakkalu tamakkiisumik atorsinnaagakkit, isiginnaartitsisarfimmi pisortanngortussaq oqarpoq, nangillunilu:
- Akisussaaffingaatsiamik tunineqarpunga, Nunatta Isiginnaartitsisarfiata sulisui allat, isiginnaartitsisartut isiginnaariartartugullu peqatigalugit nunatta tamarmi qamuuna pisuunnguallatsittarsinnaanissaanut sulissaanga. Nunatta Isiginnaartitsisarfia pisoqarfittut nunatsinnut tamanut allutut ilukkut anersaarfiusinnaanissaa takorluugaraara
Immikkuullarissumik misilittagaqartoq
Nunatta Isiginnaartitsisarfiata pisortartaassaa Vivi Sørensen Nunatta Isiginaartitsinermik Ilinniarfiata akisussaasutut aqustsisuuffigaa, 1.juni 2023 Nunatta Isiginnaartitsisarfiani pisortatut atorfimminut inississaaq.
Vivi Sørensen isiginnaartitsisarnerup silarsuaanit misilittagarpassuani pissutigalugit atorfimmut piukkunnarnersaasoq, Nunatta Isiginnaartitsisarfiani siulersuisuni siulittaasoq, Kimmernaq Kjeldsen isumaqarpoq.
- Vivi ukiuni amerlaqisuni malinnaavigisimavara, immikkuullarilluinnartumik misilittagaqarpoq. Meeraallunili isiginnnaartitsisartunikuuvoq, Den Danske Scenekunstskolemiliu ilinniagaqartuulluni kingorna inerisaqqillugu ”Master of Fine Arts in Theatre Directing” University of Ottawami, taamaammat tulluaqqissaarsimavoq takorluukkani Nunatta Isiginnaartitsisarfia aqqutigalugu inerisaqqitsinnissaanut matuersaasernissaa. Vivi eqqumiitsuliortutut tamatta tarrarsorfigisinnaalluarparput, aqqutaanilu tapersersorluakutsoorniarumaarlutigu.