Odensemi kalaallit ullui
Pisarnertut uumasuusivimmi aamma ukioq manna kalaallit ullui ingerlanneqarput
Soorlu ukiut siuliini pisarnertut uumasuusiviup kalaallillu illuata suleqatigiinnerisigut pisarnertullu februaarimi sapaatit akunnerata naanerisa ilaanni kalaallit ullui ingerlanneqarput.
Arfininngormat ualikkut inuppassuit uumasuusivimmukaapput qimmit, qimussit tuniniaaviillu sanalukkanik tamulugassanillu tuniniaasut takuniarlugit.
Danmarkimi ukiuunerani issilluarnera aaqqissuussinermut tulluarpoq. Meerapassuit aamma qimusserarnissaminnut periarfissaqarput. Danmarkimi aputeqannginnerata kingunerisaanik qimmiutillit qimussinut taarsiullugit qamutinik assakaasulinnik qumusserarnneq sungiussimavaat.
Kangaatsiameersoq maannakkullu Odensemi najugaqartoq Nikolaj Filemonssen qimmiminik takutitsivoq qimusserniartillunilu suut atorneqartussaanersut oqaluttuaralugu.
Aamma aliikkusersuisoqarpoq. Erinarsoqatigiit Umiaq erinarsorlut Conna Flyp meeqqat inersimasullu uaajeerfigai.
Rasmus Lyberth peqataavoq
Rasmus Lyberthip Atlantikup avannaata illussaa oqaluttuaraa soorunalumi aamma eriniarsorluni.
Rasmus Lyberth Sermitsiaq.AG-mut oqaluttuarpoq USA-mut qaaqquneqarsimalluni. Marsip aallartinnerani aallassaaq Washingtonimi Kennedy Hallimi tusarnaartitsiartorluni.
Uumasuusivimmut takuniaasut arlalissuit periarfissaq iluatsillugu puisit amiinik kavaajaliat takuniarpaat. Inuit arlaqartut kalaallinit kingoqqisuusut Sermitsiaq.AG-mit oqaloqatigineqartut iluarusoqaat. Ilaat qimmit qimussillu akornanni angalaarujoorput nunarput eqqarsaatigerujoorlugu.
Nalorninaatsorli unaavoq: Nunatsinni Danmarkimilu qimmit qimuttut nipaat assigiipput.