Palle Normandiamiittoq
Ilinniartitaanermut, ilisimatusarnermut nunanilu avannarlerni suleqatigiinnermut naalakkersuisuni ilaasortaq Palle Christiansen Frankrigimut tikeraarnini naggaserlugu Nomandiamut takornariarpoq
Vikingit Normandiamut tikeqqaarneranniit ukioq manna 1100-nngortorsiorneqarpoq. Nalliuttorsiutigineqarnerani ilinniartitaanermut naalakkersuisup Palle Christiansenip akuuffiginera iluatsiinnarlugu illoqarfik Caen-imi ilisimatusarfik takornariarpaa, taassumalu nunat avannarlernit sunnerneqarnermut misissuivia alakkartermagu tikilluaqqusaassimaqaaq. Taama Damien Degeorges Frankrigimiit nalunaaruteqarpoq.
Nunat avanarliit pillugit franskit festivalerisartagaat Les Boréales-imiit aallartitaq Palle Christiansenip Caenimi aamma naapippaa. Ukiorlu manna 20-ssaanik festivalertoqalerpat Damien Degeorgesip nunatsinni assilisarisimasai saqqummersinneqartussaapput. Assit saqqummersassat Parisimi danskit nunanut allanut aallartitaqarfiata tapersersuineratigut piviusunngorsinnaasimavoq, saqqummersitsinerlu ukioq manna novembarip 3-niit 19-iata tungaanut "Maisoq de l'Étudiant"-imi Caen-imiittumi ingerlanneqarumaarluni.
Les Boréales ingerlanneqalerpat kalaallit kultooriata annertunermik nittarsaanneqarnissaa Palle Christiansenip piumasaraa, aamma nunarput pillugu Caen-imi ilisimatusarfik annertunermik sammisaqalersikkumagaluarpaa, nunallu avannarlernut tunngasunik paasiniaaneranni oqaatsitta ilinniarneqarsinnaanera aamma taputartuukkumagaluarlugu, taama Degeorges paasissutissiivoq.
Pallep angalaarnini naggaserlugu sineriammi illoqarfik Trouville-sur-Mer tikeraarumaarpaa. Tassanilu borgmesteriusup Christian Cardonip Palle Christiansen tikilluaqqujumaarpaa.
Illoqarfik Trouville-sur-Mer Frankrigimi atajuaannartitsinissap tungaanut ineriartortitsinermi siuttunut ilaavoq, tassanimi hiistit atugaaleqqissimapput, ilaatigut illoqarfimmi puiaasakunik eqqakkanillu katersinermi hiistit atorneqalersimallutik. Suliniut avatagiisinut ajoqutaanngitsoq sullivigineqassalluni nuannarineqaqaaq innuttaasullu akornanni ataqatigiinnerulernermik misigisitsisimalluni. Suliniut taanna Frankrigimi Europamilu illoqarfiit 100-t sinnillit assigusumik suliniuteqarnissaanut soqutiginnilernermik kinguneqarsimavoq.
Tamatumunnga atatillugu nunarsuarmi illoqarfiit pingaarnersaat CO2-mik aniatitsiffiunngitsut illoqarfipput Nuuk siullersaanngoriaannaanera Palle Christiansenip taakkartormagu soqutiginnittorpassuusimapput, Frankrigimilu aviisit annersaani Ouest France-imi ulluni pingasuni tulleriiginnarmik ilanngutassiarineqartarsimalluni.
Pallep Frankrigiliarnera Parisimi, Caen-imi, Trouville-sur-Mer-imilu maluginiarneqarsimaqaaq, franskillu nunatsinnut tunngasunik paasinnitaasaanik nutaalianngorsaasimalluni, taama Damien Degeorges oqaluttuarpoq.