Danmark
Péronard nutaamik filmiliulerpoq
´Sume - pikititsinerup nipaa´-nik filmiliortoq filminik naatsunik, Danmarkimi kalaallinut ilinniagaqartunut samminnittunik, sananialerpoq
Kalaallit Nunaannut Danmarkimut ilinniariartorluni nuunneq inuunermik allanngortitserujussuartarpoq.
Tamanna Emile Hertling Péronardip, filmimik piviusulersaarummik nersualaarneqaqisumik ´Sume - pikititsinerup nipaa´-nik sanasimasup, tappavani ilinniartuusimanerminit nalunngilaa. Taannalu maanna pingasunik naatsunik filmiliornialerpoq, ilinniagaqartut nunami allami nutaamik inuuneqalernissaannut piareersartinniarlugit.
Taamatut sapaatip akunnerani kingullermi kalaallinut tappavani ilinniagaqarniartunut 14-inut nalunaajaateqarpoq, Københavnimi Kalaallit Illuutaata aaqqissuussaanik kalaallinut ilinniagaqartunut paasissutissiiniarluni aaqqissuussinermi.
Emile Hertling Péronardip saqqummiussinermini ilinniagaqartutut nammineq misigisimasani oqaluttuarai.
– Maanna qallunaanngissaqaanga, eqqarsarsimavunga.
Ukiualunnguilli qaangiuttut ajortoqartoq paasilersimavaa. Misigissutsillu pissutigalugit Kalaallit Nunaannut utertariaqalersimavoq.
Allat misilittagaat
Filmit naatsut tunngaveqassapput maanna qangalu ilinniagaqartut misilittagaannik. Nunatsinni angerlarsimaffinni tamani atorneqassapput GU-milu takutinneqarsinnaallutik, taamaasilluni inuusuttut allat misigisarsimasaat iluaqutigisinnaallugit, taamalu ilinniakkamik ingerlannissaannut perrassarlutik.
Ullumikkut Kalaallit Illuutaat annertuumik iliuuseqartarput ilinniagaqartut inuunerminni nutaami ingerlalluarnissaannut. Taamaasilluni Københavnimi Kalaallit Illuutaat ilinniagassanut caféqarpoq studiegruppeqarlunilu.