Perorsaasoq 70-kkunni nunatsinniissimasoq: "Meeqqap ataatsip gummiisa alui nungullarsimapput"

Ellinor Fobian, qallunaajusoq, 1973-imi Kalaallit Nunaannut perorsaasutut suliartorniarluni aajangerpoq.

Siullermik Nuummukarpoq, tassani atuareernerup kingorna ornittakkami sulilluni. Ilaqutariit nunaqarfinniit illoqarfinnukaanneqarsimasut meerartai tassani atuareernerup kingorna ornittakkamiittarput. Tamanna danskit naalakkersuisuisa Kalaallit Nunaannut politikkiannut ilaavoq.

Piitsuuneq atuakkiortumut sunniuteqangaartoq

Ellinor Fobianip aallaqqaammulli piitsuussuseq maluginiarluarsimavaa:

- Meeqqat ilaat isikkamigut annertuumik qaattorsimavoq. Gummimi alui nungullarluinnarsimammata isikkamigut qaattoorpoq. Sila qulinik issittoq isigaannaalluni pisuttarpoq.

Ellinor Fobian piffissap sivikitsup ingerlanerani atisanik katersuiniarpoq. Panimi Danmarkimi atuarfiani klassi atisanik tunniussilluni nassiussivoq. Ellinor Fobianillu atisanik errorsinissaq panersiinissarlu isumagai.

Qallunaat misileraanerat Kalaallit Nunaannut sunniuteqarnerluttoq

Ellinor Fobianip atuakkiamini "Børnene under Nordlyset"-mik qulequtsersimasamini Kalaallit Nunaanni 1970-kkunni perorsaasutut sulisimanermini kalaallit nuutsitaasimanerat qanoq sunniuteqarsimanersoq allaaseraa.

Taanna naapertorlugu qallunaat misileraanerat kalaallinut kinguneqarnerluppoq.

- Kalaallit inuiaqatigiinni nunaqarfinni mikisuneersuupput, atukkaminnik imminnut susassareqatigiinneq sungiusimavaat. Tassanngaannarlu inissianut sungiusimanngisaminnut nuummut nuutsitaapput. Tassanilu imigassanut killeqanngitsumik ammaanneqarlutik. Imigassaq aqqutigalugu anniaatiminnik puigorniarsarisut amerlapput, Ellinor Fobian oqaluttuarpoq.

Meeqqat atugaat Christianshavn Torvimi takusinnaavai

Ukiorpaaluit Nuummeereerluni Qasigiannguanukarpoq ukiiartorluni. Kingorna Københavnimut angerlaqqippoq, tassani meeqqanik Vesterbromi sullissaqarluni. Inissiaq 1966-mili najukkani maanna suli najugaraa. Ilaatigut Christianhavn Torvimi pisuttuartarpoq.

- Nuummiinninni perorsaasutut sulininni meeqqat sullissimasamma ilaat naapippara. Inuppassuit tassaniittut inuunerminni atugarliorsimaqaat, uagullu qallunaat paasisariaqarparput suna peqqutaanersoq. Tassani atuakkianni paasititsiniutigerusullugu allaaseraara, Ellinor Fobian oqarpoq.

Atuagaq “Børnene under Nordlyset” qallunaat atuagaarniarfiini februaarip ulluisa 22-anni pisiarineqarsinnaalissaaq.