Piviusulersaarut
Piviusulersaarut Arfernat kiisami angallanneqalerpoq
Inuusuttup Avannaata Qimussersuani peqataaqqaarnera pillugu piviusulersaarusiaq kiisami nunatsinni illoqarfinni arlalinni takutinneqartussanngorpoq
Arfernat, Nuummi ukiarmi Greenland Eyes Film Festivalertoqarnerani takuteqqaarneqartoq, nunatsinni illoqarfinni arlalinni takutinneqartussanngorpoq.
Piviusulersaarummi angut inuusuttoq qimussertartoq, ataatami qimmiinik pisimasoq, inuunerminilu siullerpaamik Avannaata Qimussersuani peqataalersoq, malinnaavigineqarpoq.
Filmimi piviusulersaarummi ilimanarmiu Ove Johansen Avannaata Qimussersuani 2012-imi Qasigiannguani ingerlanneqartumi peqataanera malinnaavigineqarpoq.
Arfernat suliarineqarluni siorna piareeqqammiinnartoq Nuummi Greenland Eyes International Film Festivalertoqarnerani takutinneqarpoq, ukiallu ingerlanerani aamma nunani avannarlerni takutinneqartarsimalluni.
Atuaruk: Avannaata Qimusersua pillugu filmiliaq
Ilitsersuisut filmip avannaani takutinnissaa qilanaaraat
- Piviusulersaarutip takutinnissaa qilanaaraarput, aamma pissangagivarput avannaani qimmeqarfiusumi qanoq tiguneqarumaarnersoq, piviusulersaarummut ilitsersuisut Rune Bundgaard aamma Martin Svinkløv Sermitsiaq.AG-imut oqarput.
Filmiliornermi ilitsersuisut oqaatigaat aallaqqaataaniilli kissaataasimasoq piviusulersaarutip nunatsinni takutinneqarnissaa.
- Maanna kiisami iluatsippoq, tassa Arfernat Sisimiuni, Aasianni, Ilulissani, Qasigiannguani aamma Nuummi qaammatini tulliuttuni takutinneqartussanngorpoq. Takutitsinerni arlalinni ilitsersuisut marluullutik imaluunniit aappaannaa aamma najuuttarumaarput, filmi isiginnaartunut saqqummiutigalugu apeqqutissaannut akissuteqartarumaarlutik, ilitsersuisut Sermitsiaq.AG-mut oqaluttuarput.
Arfernat Rune Bundgaardip aamma Martin Svinkløvsip filmiliaqqaatigivaat. Taakkua tamarmik Qasigiannguani efterskolimi ilinniartitsisuusimapput.
Arfernat ukunani takutinneqassamaarpoq:
7. - 8. februar: Sisimiut
18. februar: Aasiaat
21. - 25. februar: Ilulissat
27. - 28. februar: Qasigiannguit
28. februar og 1. marts: Nuuk