Inuiattut ullorsiorneq
Qaqortumi Inuiattut Ullorsiornermit assilisat
Naalakkersuisunut ilaasortaasimasoq Hendrik Nielsen namminerisatsinnik erfalasoqalernissatsinnik siunnersuuteqarsimavoq, Jørgen Wæver Johansen inuiattut ullorsiornitsinni oqalugiarnermini oqarpoq
Kommune Kujallermi borgmesterip Jørgen Wæver Johansenip inuiattut ullorsiornitsinni oqalugiarnermini erfalasorput, ilinniartitaaneq nunattalu siunissaa sammivai.
- Inuiattut ullorsioraangatta ataatsimoorneq misigisarparput, Jørgen Wæver Johansen Qaqortumi inuiattut ullorsiornermi oqalugiaammini oqarpoq.
Kommune Kujallermi ullortuneq inuiattullu ullorsiorneq nalliussineqaraangata nunat avannarliit Canadallu erfalasui ilanngullugit amuneqartaraluarput. Ukioq mannaanngitsorli.
- Maluginiarsimassavarsi ullumikkorpiaq erfalasulerfiit taakku tamarmik nammineq erfalasutsinnik erfalasulerneqarsimasut. Taamaaliorpugut erfalasorput tulluusimaarutigisarput atoqqaartinneqarnerminiit ullumikkorpiaq ukiunik 30-nnngortorsiormat – tamannalu soorunami malunnartikkusukkatsigu.
- Erfalasorput katinngaterput, ataatsimoorfipput nalliuttuni, persuarsiornerni, nuannaarnerni aliasunnernilu erfalajuartoq; taassumap eqqaasittarpaatsigut kinaanitsinnik. Seqineq inuuneqartitsisoq tassaavoq erfalasutsinni qitiutitarput taassumap eqqaasippaatigullusooq inuunitsinni aamma perlussiortarnitsinnik perlussiornerilli seqinermik taarteqartuarnerannik, soorlu ullumi aamma taannaqqissaaq nalliussigipput. Ukioq issik - perluk aamma kialaamik taarteqartarmat, taarneq qaamanermik taarteqartarmat - aliasunnerlu aamma nuannaarnermik taarteqartarmat.
- Erfalasorput ataqqisarput amuneqaqqaarneranit ullumi ukiut 30-it qaangiussimalerput. Eqqaaneqaraangat tamatigut erfalasutsinnik ilusilersuisoq aamma eqqaaqqajaaneqartarpoq, soorunami, kisianni eqqaaneq ajorparput erfalasutaarnissatsinnik siunnersuuteqartoq. Siunnersuuteqartoq qujanartumik akunnitsinniippoq, nunaqqatigaarput – ullumikkullu aamma erfalasutsinnik amuseqatigaara, Indaleeraq - Hendrik Nielsen – qujanaq kalaallit qaqugorsuarmut atugassatsinnik, kinaanitsinnik ilisarnaatissatsinnik allat peqatigalugit tamaviaaruteqarsimanerit pillugu, Jørgen Wæver Johansen oqarpoq.
Borgmesterip inuusuttut eqqarsaatigalugit eqqaasitsissutigaa, ulluni makkunanerpiaq - Nunatsinni tamarmi - inuiaqatigiittut nuannaarutissatta aamma ilagaat ilinniarfinni ilinniakkaminnik naammassinnissimallutik nasartaartorpassuit. Ukiuni makkunani nuannaarutigisinnaavarput inuussuttut ilinniakkaminnik naammassinnittartut ukiut tamaasa amerliartormata. Ilinniarnertuunngortut – allallu ilinniakkaminnik aallussereerlutik naammassinnittut tamaasa – tulluusimaarutigeqaagut, taakkulu tamaasa isumalluarfigalugit, Jørgen Wæver Johansen oqarpoq, inuusuttullu ilinniagaqarneranni kaammattueqataasimasut aamma qutsavigalugit. Ilinniartut tamassi neriuummik nutaamik ukiut tamaasa Nunatsinni pilersitsivusi – ilorraap tungaanut ingerlanitsinni naatsorsuuteqarfigaatsigit.
- Oqartoqartarpoq ”Sinnattut kusanassusiannik upperinnittut – siunissaq pigigaat!” Ilumut taamaappoq, siunissamummi neriuuteqarnissamik pigisaqarnissaq tamatsinnut pingaaruteqarluinnarpoq – inuunerummi toqqammavigaa neriuuteqarneq, borgmesteri oqarpoq suleqatigiinnerlu tamanut pissarsissutaasoq nersualaarlugu.
Sanaartornerup iluani pisoqarnerunissaa paasissutissiissutigaa, mittarfissamullu aqquserngup sanaartorneqalersimanera nuannaarutigalugu. Taamatuttaaq Kujataani aalisagartassiissutit qaffaavigineqarsimanerat nuannaarutigga.
- Puigornaguli inuinnaassuserput, tamattami tarnikkut nukittorsaqatigiittarnissarput pisariaqartittuarparput - soorlu taalliortutta ataqqinartut ilaat, Isak Lund tussiusiami ilaanni ima allattoq:
"Naalannangaartoq Guuterput-aa
Maani inuuneq nakussatiguk;
Tarnikkut aamma
timitsigullu taama
Pissatsitaasumik inooqqulluta.”
Jørgen Wæver Johansen oqarpoq ullortunersiornissatsinnullu piareersaallutik sulisimasorpassuit – ullumikkullu suleqataasorpassuit tamaasa qutsavigalugit - ullortunersiorluarnissaannillu kissaallugit – inuiattullu ullorsiornitsinni pilluaqqullugit.